viernes, 19 de junio de 2026
A conselleira de Promoción do Emprego e Igualdade, María Jesús Lorenzana, valorou hoxe os datos do paro rexistrado e de afiliacións á Seguridade Social destacando que Galicia pechou marzo coa cifra de desemprego máis baixa de toda a serie histórica (1996) neste mes. Salientou que o paro caeu e as afiliacións creceron tanto na evolución anual como mensual. Seguimos cunha liña continuada e constante de baixada do paro e de subida das afiliacións, engadiu.
Con respecto a marzo do pasado ano, o paro diminuíu nun -7,49% (-11.489 persoas), unha caída que se reflectiu nas catro provincias e nas sete grandes cidades galegas; tamén en todos os sectores económicos, liderando o descenso o primario (-16,10%), seguido da industria (-12,13%). Por colectivos prioritarios para a Xunta tamén decreceu, especialmente entre os menores de 30 anos (-11,02%) seguido das mulleres (-6,86%) e dos parados de longa duración (-4,70%). As cifras de parados de menos de 30 anos e de mulleres sen emprego son as menores da serie histórica (2006) para este mes. Ademais, o número de persoas paradas de longa duración é o máis baixo nun marzo desde 2009.
As afiliacións, pola súa banda, continúan a superar a barreira do millón, situándose a cifra (1.043.530) a un nivel superior ao reflectido hai 14 anos; e a contratación indefinida aumentou tamén, nun +7,48% en Galicia.
En canto á comparativa co mes pasado, o paro tamén diminuíu en Galicia, nun -1,56% (-2.245). Lorenzana salientou que o desemprego con respecto a febreiro descendeu en todos os sectores económicos, liderando a caída a construción (-2,49%), seguido da industria (-2,14%). As afiliacións tamén creceron na comunidade galega, nun 0,74%, así como a contratación en xeral e nas modalidades indefinida e a tempo completo con respecto a febreiro.
Lorenzana, para rematar, apuntou á importancia de seguir a traballar na casación de oferta e demanda laboral e na atracción de persoas traballadoras, máis poboación activa, a través do programa Retorna Cualifica Emprego.
O programa formativo Medrando Xuntas permitiu que as mulleres participantes traballasen habilidades clave como a comunicación, a organización, o liderado, a toma de decisións, a participación interna e a mellora da confianza profesional, ao tempo que se fomentou a creación dunha rede de mulleres que se apoian, colaboran e comparten recursos e que se deron a coñecer proxectos que están a transformar a economía. En primeiro lugar, Medrando Xuntas contou cun programa formativo para reforzar a súa participación nas entidades de economía social. En segundo lugar, a formación para directivas estaba dirixida a mulleres con responsabilidades de dirección ou proxección cara ao liderado.
Unha alianza entre o Instituto Tecnolóxico de Galicia (ITG) e as compañías Naturgy InnovaHub e Flythings Technologies desenvolverá unha plataforma enerxética que transformará residuos en produtos de alto valor engadido. Neste caso transformaranse residuos como lodos de depuradora, restos orgánicos e biomasas, en produtos de alto valor engadido como biocombustibles (hidrochar e biometano) e vectores enerxéticos sostibles (hidróxeno e syngas). Para iso, a nova unidade mixta combinará distintas tecnoloxías e incorporará sistemas híbridos de almacenamento con baterías e supercondensadores, ademais de empregar ferramentas como Internet das cousas, os xemelgos dixitais e a aprendizaxe automática.
