viernes, 9 de octubre de 2026
A Consellería de Cultura, Educación, FP e Universidades amplía así a rede de colaboración con entidades e estruturas teatrais doutros territorios que está a manter a través do Centro Dramático Galego, coa súa recente presenza noutros festivais internacionais como o de Almagro, o de Maltepe en Estambul ou o do Alentejo en Portugal, ademais da súa implicación en dous proxectos europeos e noutros programas de intercambio que estenden a súa actividade a 13 países.
Ata o 2 de abril en Santiago
Shakespeare en Roma, que continúa en cartel ata o vindeiro 2 de abril no Salón Nobre do compostelán Pazo de Fonseca, ofrece un achegamento inédito e singular ás catro pezas que o gran dramaturgo inglés ambientou no Imperio Romano (Coriolano, Xulio César, Antonio e Cleopatra, e Tito Andrónico), condensadas en pouco máis de dúas horas a partir de catro olladas dramatúrxicas diferentes e levadas a escena por outros tantos equipos de dirección cun mesmo elenco de oito intérpretes.
Coa súa posta en escena no famoso teatro romano de Mérida, a compañía continuará afondando no ambiente e o espírito orixinal das obras asinadas polo gran dramaturgo británico, do mesmo xeito que está a facer en Santiago durante as súas representacións nun escenario pouco convencional como o Pazo de Fonseca, na que os espectadores se dispoñen nas cadeiras do Salón Nobre a modo de Senado romano.
Xurxo Cortázar, Sheyla Fariña, Cris Iglesias, Rebeca Montero, Marcos Orsi, Fran Peleteiro, Santi Romay e Toni Salgado danlles vida aos 47 personaxes desta proposta baixo as direccións de Rui Madeira para a versión condensada de Coriolano polo autor ucraíno Volodymyr Snegurchenko, María Barcala e Xúlio Lago para a de Xulio César asinada por Ana Carreira, Sara Rey para a de Antonio e Cleopatra por Ana Abad de Larriva e Quico Cadaval para a de Tito Andrónico por Lorena Conde.
Pola súa banda, o dúo Saturna asina o deseño de vestiario; Xosé Lois Romero, o espazo sonoro, e Juanjo Amado, a iluminación, mentres que Keka Losada e José Díaz encárganse respectivamente da asistencia de dirección e de produción.
As entradas para as dúas últimas semanas de funcións en Santiago de Shakespeare en Roma, programadas de mércores a domingo ás 19,00 h., poden adquirise por adiantado na web www.entradasataquilla.com a un prezo de 10 euros, sobre o que se aplican os descontos habituais, e de 6 euros para os domingos, día do espectador. Cóntase ademais, cun despacho de billetes no Pazo de Fonseca, que abre ao público unha hora antes do comezo das representacións.
Foi presentada a novena edición de Intersección, Festival Internacional de Cine da Coruña, celebrada nos Cantones Cines. O festival desenvolverase do 13 ao 17 de outubro cunha programación que combina proxeccións, exposicións, formación e encontros profesionais arredor das novas linguaxes cinematográficas. Así, as seccións competitivas Galicia, Internacional e Fulgor achegarán ao público obras afastadas dos circuítos comerciais habituais e novas voces da creación audiovisual contemporánea. En concreto, a sección Internacional reúne 27 filmes procedentes de 22 países, entre os que figuran catro estreas mundiais, 17 en España e cinco en Galicia. As propostas exploran cuestións como a tecnoloxía, a memoria, o territorio e a identidade desde linguaxes e xeografías diversas.
A Real Academia Galega de Ciencias (RAGC) celebrou en Santiago, no Salón Nobre do Colexio de Fonseca, o acto do Día da Ciencia en Galicia, no que se homenaxeou á oceanógrafa Aida Fernández Ríos (Vigo, 1947 - Moaña, 2015) como Científica Galega 2026. Ademais, entregáronse as Medallas de Investigación a cinco científicas e científicos da nosa comunidade. O presidente da Academia destacou que 'Aida Fernández Ríos foi unha investigadora capaz de identificar problemas relevantes e de situalos nun contexto internacional, converténdose nunha científica respectada moito máis alá de Galicia.
