viernes, 9 de octubre de 2026
O conselleiro de Facenda e Administración Pública, Miguel Corgos, subliñou hoxe que 98% dos concellos galegos teñen acceso a servizos financeiros, fronte ao 60% da media española, o que converte a Galicia na segunda comunidade autónoma de España coa maior porcentaxe de concellos no seu territorio no que os veciños e veciñas teñen garantida a accesibilidade a estes servizos.
Miguel Corgos, acompañado polo delegado da Xunta en Ourense, Gabriel Alén, asinou hoxe cos alcaldes de Punxín e Toén, sendos convenios para a posta en marcha de servizos financeiros nestes municipios.
Estes convenios enmárcanse no novo prazo de adhesión aberto en febreiro ao protocolo de colaboración asinado entre o Goberno galego e a Federación Galega de Municipios e Provincias (FEGAMP) e dirixido a aqueles concellos que na actualidade aínda non contaban con servizos financeiros.
Unha vez que se remate esta segunda rolda, o 99% dos concellos galegos terán acceso aos servizos financeiros no seu propio municipio, co que se cumpre o obxectivo da Xunta de loitar contra a problemática que supoñía o acceso aos servizos bancarios no rural, evitar a exclusión financeira e promover que toda a poboación galega, con independencia do seu lugar de residencia, teña acceso aos servizos financeiros.
Esta iniciativa á que xa se adheriran 36 concellos e se beneficiaron máis de 51.000 galegas e galegos na primeira fase, permitiu que os veciños tiveran caixeiros automáticos nos seus municipios; dispuxeran dun servizo de asistencia financeira para solucionar calquera dúbida e poder contratar produtos igual que nunha oficina bancaria convencional; así como a oportunidade de recibir formación financeira e banca electrónica para que poidan utilizar tamén os servizos bancarios a través das novas tecnoloxías.
Tras o éxito destas medidas para loitar contra a exclusión financeira, o Goberno galego abriu un novo prazo para que os municipios que aínda non se adheriron a este convenio o puidesen facer se o desexaban. Nesta nova fase adheríronse cinco concellos: Punxín, Toén, Beade, Castrelo do Val e Ribeiras de Sil.
Foi presentada a novena edición de Intersección, Festival Internacional de Cine da Coruña, celebrada nos Cantones Cines. O festival desenvolverase do 13 ao 17 de outubro cunha programación que combina proxeccións, exposicións, formación e encontros profesionais arredor das novas linguaxes cinematográficas. Así, as seccións competitivas Galicia, Internacional e Fulgor achegarán ao público obras afastadas dos circuítos comerciais habituais e novas voces da creación audiovisual contemporánea. En concreto, a sección Internacional reúne 27 filmes procedentes de 22 países, entre os que figuran catro estreas mundiais, 17 en España e cinco en Galicia. As propostas exploran cuestións como a tecnoloxía, a memoria, o territorio e a identidade desde linguaxes e xeografías diversas.
A Real Academia Galega de Ciencias (RAGC) celebrou en Santiago, no Salón Nobre do Colexio de Fonseca, o acto do Día da Ciencia en Galicia, no que se homenaxeou á oceanógrafa Aida Fernández Ríos (Vigo, 1947 - Moaña, 2015) como Científica Galega 2026. Ademais, entregáronse as Medallas de Investigación a cinco científicas e científicos da nosa comunidade. O presidente da Academia destacou que 'Aida Fernández Ríos foi unha investigadora capaz de identificar problemas relevantes e de situalos nun contexto internacional, converténdose nunha científica respectada moito máis alá de Galicia.
