viernes, 9 de octubre de 2026
O conselleiro de Cultura, Educación, FP e Universidades, Román Rodríguez, asistiu no Museo Centro Gaiás da Cidade da Cultura á instalación en sala dunha das obras máis destacadas que se exhibirán na exposición Detrás do espello: o diario manuscrito do escritor austríaco Stefan Zweig, que por vez primeira se pode ver en España. Nesta peza, procedente do Arquivo de Literatura da Universidade de Salzburgo, o escritor austríaco describe a súa visita a Vigo menos dun mes despois do golpe franquista e augura o ascenso do nazismo en Europa.
Os comisarios da exposición, Antón Reixa e Xosé Luís García Canido, e o equipo técnico da Cidade da Cultura desenvolveron os traballos de colocación da peza na que será o seu fogar temporal ata o vindeiro 11 de xuño. As tarefas foron supervisadas a través de videoconferancia pola arquivista e xefa adxunta de Arquivos da Literaturarchiv Salzburg, Lina María Zangerl.
O titular de Cultura do Goberno galego quixo incidir na relevancia histórica deste diario que recolle a viaxe de Zweig no buque británico Alcántara, que atracou no porto de Vigo menos dun mes despois do golpe de Estado franquista. Salientou así a oportunidade que supón exhibir, por vez primeira en España, este extraordinario documento e lembrou que este paseo de Zweig polas rúas de Vigo forma parte da xénese do seu libro máis destacado e un dos principais da literatura europea contemporánea: El mundo de ayer.
Os comisarios da mostra concordaron tamén na pertinencia de contar con esta peza en exhibición nun momento que foi bautizado pola prensa internacional como o ano de Stefan Zweig por coincidir co paso a dominio público das súas obras. O escritor austríaco, destacan Reixa e García Canido, estivo menos dun día en Galicia, tempo suficiente para intuír todo o que acontecería en Europa desde finais dos anos 30 ata a II Guerra Mundial e a caída do nazismo.
Cronista da Europa do século XX
Stefan Zweig (Viena, 1881 Petrópolis, Brasil, 1942) foi un escritor enormemente popular, tanto na súa faceta de ensaísta e biógrafo como na de novelista, converténdose en maxistral testemuña e cronista da desintegración europea do século XX e nun dos narradores máis lidos e queridos por crítica e público. Destacou tamén polas súas firmes posicións éticas en contra da guerra, que o levaron a ser perseguido polo réxime nazi que prohibiu varias das súas obras e ao exilio, onde se suicidou en 1942.
Olladas de Galicia desde o exterior
Detrás do espello é un proxecto comisariado polo comunicador e xestor cultural Xosé Luis García Canido e polo músico, autor, produtor, e director audiovisual Antón Reixa, recoñecido en 2021 coa Medalla de Ouro ao Mérito nas Belas Artes. A exposición, que se inaugura o luns 6 de marzo, componse dunhas 300 pezas a través das que explora o vencello con Galicia de medio centenar de figuras foráneas das artes plásticas, a literatura, o cinema, a ciencia ou o pensamento ao longo do último século. Nomes como Einstein, Hemingway, Cortázar, Isabel Coixet, Cristina García Rodero, Borges, Luis Buñuel ou o propio Stefan Zweig son algúns dos nomes que se debullan nesta mostra.
Foi presentada a novena edición de Intersección, Festival Internacional de Cine da Coruña, celebrada nos Cantones Cines. O festival desenvolverase do 13 ao 17 de outubro cunha programación que combina proxeccións, exposicións, formación e encontros profesionais arredor das novas linguaxes cinematográficas. Así, as seccións competitivas Galicia, Internacional e Fulgor achegarán ao público obras afastadas dos circuítos comerciais habituais e novas voces da creación audiovisual contemporánea. En concreto, a sección Internacional reúne 27 filmes procedentes de 22 países, entre os que figuran catro estreas mundiais, 17 en España e cinco en Galicia. As propostas exploran cuestións como a tecnoloxía, a memoria, o territorio e a identidade desde linguaxes e xeografías diversas.
A Real Academia Galega de Ciencias (RAGC) celebrou en Santiago, no Salón Nobre do Colexio de Fonseca, o acto do Día da Ciencia en Galicia, no que se homenaxeou á oceanógrafa Aida Fernández Ríos (Vigo, 1947 - Moaña, 2015) como Científica Galega 2026. Ademais, entregáronse as Medallas de Investigación a cinco científicas e científicos da nosa comunidade. O presidente da Academia destacou que 'Aida Fernández Ríos foi unha investigadora capaz de identificar problemas relevantes e de situalos nun contexto internacional, converténdose nunha científica respectada moito máis alá de Galicia.
