miércoles, 7 de mayo de 2025
A Xunta de Galicia conmemora hoxe o 186 aniversario do nacemento de Rosalía de Castro cunha programación organizada xunto coa Fundación que leva o nome da autora de Cantares gallegos e que arrincou esta mañá no Instituto Camilo José Cela de Padrón cunha lectura de poemas diante da estatua da homenaxeada.
O secretario xeral de Política Lingüística, Valentín García, e o director xeral de Cultura, Anxo M. Lorenzo, participaron na compostelá praza de Vigo na ofrenda floral á autora, amenizada cunha alborada da man dos Carapaus. Un acto no que Valentín García expresou o seu desexo de que o Día de Rosalía chame a atención de toda a sociedade sobre as causas que defendeu a nosa poeta máis universal, como a da igualdade, a da xustiza, a da cultura e, sobre todo, da lingua de Galicia.
A actividade central da conmemoración, que se desenvolve no Hostal dos Reis Católicos, consiste na lectura de poemas. Autoridades e figuras destacadas da esfera cultural como o presidente da Real Academia Galega, Víctor F. Freixanes, ou a presidenta do Consello da Cultura Galega, Rosario Álvarez, dan voz a Tecín soia, ao prólogo de Follas Novas ou a Máis o que ben quixo un día, entre outros textos da autora. Pecha o acto a actuación dos Carapaus, acompañados das alumnas da Escola Municipal de Música de Santiago, Estela Pereira ao piano e Lía Ferrer ao violonchelo.
Actos variados ao longo de toda a xornada
Pola tarde, a Casa de Rosalía acollerá a sétima edición da iniciativa do Caldo de Gloria co chef do asador O Pazo Óscar Vidal. Este caldo, descrito nun texto rosaliano, tamén se tomará na Casa-Museo de Curros Enríquez, en Celanova, e na Fundación Eduardo Pondal de Ponteceso.
Ademais, a Xunta, en colaboración coa Fundación Rosalía de Castro, repartiu 46.000 manteis de papel co poema de Rosalía que inspirou esta iniciativa, Miña casiña, meu lar, para que máis de 200 hostaleiros e máis de 70 comedores escolares, así como concellos e empresas de toda a xeografía galega, se sumasen ao Caldo de Gloria. Para rematar as celebracións, a cantante e compositora Belém Tajes ofrecerá unha actuación no auditorio da Casa-Museo ás 20,00 h.
O titular do Executivo galego, Alfonso Rueda, anunciou hoxe que o Plan de simplificación e axilización de dependencia e discapacidade permitiu acadar preto de 3.000 novos atendidos en abril, o que supón un récord histórico mensual desde que hai rexistros. Durante a sesión de control no Pleno do Parlamento, o presidente da Xunta afirmou que o Goberno galego vai seguir traballando en materia de dependencia e puxo en valor as cifras de atendidos en Galicia, que hoxe acadan o seu máximo con máis de 79.600 persoas no sistema. Nesta liña, recordou que desde xaneiro a Xunta de Galicia resolveu máis de 32.000 expedientes de dependencia e discapacidade, un 70% máis que o mesmo período do ano anterior. Uns datos que son posibles grazas aos funcionarios que están traballando para que ese plan de choque sexa unha realidade, remarcou o presidente.
O conselleiro de Emprego, Comercio e Emigración, José González, destacou a importancia da participación institucional de todos os axentes sociais no deseño das políticas activas de emprego impulsadas pola Xunta a través do pulo estratéxico ao Diálogo Social, unha das liñas prioritarias da Consellería. Así o puxo de manifesto esta mañá na resposta a unha interpelación no Parlamento de Galicia.
