sábado, 7 de noviembre de 2026
Alfonso Rueda e João Antonio da Costa incidiron tamén na necesidade de seguir traballando para acadar as infraestruturas pendentes entre España e Portugal a través de Galicia. O presidente da Xunta agradeceu ao Goberno portugués a través do seu embaixador a súa aposta decidida pola conexión ferroviaria de Portugal con Galicia.
Encontro cos empresarios galegos
O embaixador de Portugal en España tamén participou nun almorzo-coloquio organizado pola Confederación de Empresarios de Galicia, no que interveu o vicepresidente primeiro e conselleiro de Economía, Industria e Innovación, Francisco Conde, quen incidiu na relación de confianza entre Galicia e Portugal. Conde subliñou os retos e obxectivos comúns en sectores prioritarios como a automoción, a enerxía ou o agroalimentario e avogou por consolidar o potencial da Eurorrexión Galicia-Norte de Portugal para impulsar a súa competitividade.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
