sábado, 7 de noviembre de 2026
O ciclo dá comezo esta mesma semana con Pan y callejuela, La hora del recreo e La experiencia, que poderán verse o mércores ás 20,30 h. e o xoves ás 18,00 h. Ademais, na sesión do sábado 14 ás 18,00 h. inclúese El viajero, a súa primeira longa, que se pasará tamén o martes 17 a mesma hora. Durante este período, Abbas Kiarostami traballaba para a sección cinematográfica de Kannon, o centro iraniano para o desenvolvemento intelectual de nenos e adolescentes, de xeito que as súas primeiras fitas teñen un marcado carácter pedagóxico, ao tempo que lle servirán para ir depurando o seu estilo.
Xa en febreiro, a viaxe pola filmografía deste gran cineasta achegaralle ao público as súas películas dos anos 80 e primeiros 90, como a Triloxía de Koker, que suporán a súa consagración en Occidente, e durante os meses de marzo e abril abordarase a súa etapa máis coñecida, durante a que gaña a Palma de Ouro en Cannes por El sabor de las cerezas e experimenta con outras prácticas artísticas próximas ao vídeo arte e ás instalacións museísticas.
Paulo Rocha será obxecto doutro dos ciclos cinematográfico que botarán a andar durante o mes de xaneiro na Sala José Sellier, neste caso en colaboración coa distribuidora galega Atalante Cinema, que acaba de recuperar para o público español cinco das longametraxes deste director, considerado o pai do Novo Cinema Portugués.
Presentación polo director da Cinemateca Portuguesa
A retrospectiva recolle tamén o resto das súas longas e algunhas das súas curtametraxes, en copias recentemente restauradas pola Cinemateca Portuguesa, cuxo director, José Manuel Costa, estará na Coruña o martes 24 para o arranque do ciclo coa proxección de Os verdes anos.
Ao tempo que pon en marcha estes novos programas, a Filmoteca de Galicia avanza nos especiais que vén desenvolvendo nos últimos meses. É o caso de Filmes falados, que está a ofrecer un panorama de fitas recentes e clásicos restaurados edificados a partir da palabra. Baixo este apartado, mañá mesmo proxéctase un dos títulos que figura na meirande parte das listaxes das mellores estreas de 2021: ¿Qué vemos cuando miramos al cielo?, de Alexandre Koberidze, película xeorxiana presentada na pasada edición da Berlinale e que fabula coa posibilidade de que a Arxentina de Messi gañe o Mundial de fútbol, como finalmente aconteceu.
Gravacións televisivas de María Casares
Pola súa banda, o ciclo dedicado a María Casares encara a súa recta final con dúas sesións singulares, que reúnen traballos emitidos por televisión e que se atopan entre os máis descoñecidos da actriz coruñesa. O xoves 19 exhibirase LAffaire Lafarge, un thriller xudicial de 1954, xunto cunha curiosidade rescatada dos arquivos da televisión francesa na que se pode ver a Casares recitando en francés poemas de Federico García Lorca.
Ademais, o xoves 26 a Sala José Sellier ofrécelle ao público a oportunidade de gozar do traballo de María Casares como gran actriz de teatro en Hamlet Prince de Danemark, espectáculo dirixido por Claude Barma e gravado ao vivo pola televisión do país galo durante a súa posta en escena no festival de Carcassonne en 1960.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
