sábado, 7 de noviembre de 2026
O vicepresidente primeiro e conselleiro de Economía, Industria e Innovación, Francisco Conde, participou esta tarde en Santiago de Compostela nunha reunión previa para a constitución da Alianza industrial do hidróxeno verde. Tal e como explicou, supón sentar as bases para que Galicia poida mobilizar toda a capacidade instalada arredor do hidróxeno verde co obxectivo de impulsar a cadea de valor e xerar pegada industrial.
Na reunión, ademais da Xunta, estiveron representantes da Asociación Galega do Hidróxeno, as autoridades portuarias da Coruña, Vigo e Ferrol, Atiga, Cluergal, Asime, Ceaga, Aclunaga, o Clúster da Función Loxística e as tres universidades públicas.
Esta alianza permitirá promover proxectos xeradores desta enerxía renovable a través da colaboración público-privada, pero tamén o deseño e posta en marcha de instrumentos de apoio específicos -no que os fondos europeos terán un papel destacado-, a identificación de oportunidades, o impulso da formación en empresas, o fomento da investigación e mesmo a disposición da infraestrutura necesaria para a execución dun corredor atlántico do hidróxeno verde.
Segundo avanzou Conde, iníciase un proceso de consultas para recabar os apoios necesarios que poñan en marcha esta alianza e conseguir que Galicia dispoña dun ecosistema máis completo e diversificado neste ámbito.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
