miércoles, 29 de abril de 2026
A partir de mañá e ata o domingo, a conselleira de Medio Ambiente, Territorio e Vivenda, Ángeles Vázquez, participará nalgún dos principais eventos organizados no marco da COP27, a maior cita anual sobre cambio climático que se celebra a nivel mundial.
Cómpre subliñar a gran oportunidade que representa este evento para Galicia non só polo feito de que lle permitirá expoñer o traballo que está a desenvolver neste eido, senón tamén porque será unha ocasión única para coñecer os proxectos doutras rexións punteiras pola súa acción climática, así como a experiencia e a visión de diferentes líderes mundiais sobre cuestións tan importantes como a evolución das emisións de CO2.
A COP27 de Exipto, que comezou a pasada fin de semana e rematará o 18 de novembro, permitirá poñer en contacto a gobernos de todo o mundo e abrir un debate enriquecedor sobre os diferentes proxectos, iniciativas e políticas que cada un dos participantes está a promover co obxectivo común de frear o avance e os efectos deste fenómeno global.
Neste sentido, a conselleira buscará ideas e sinerxías con outras rexións igualmente comprometidas coa redución dos gases de efecto invernadoiro (GEI) tendo en conta, sobre todo, que a Xunta ultima a súa futura Lei do clima e está aberta a incorporar na mesma aquelas suxestións que se adapten mellor á realidade galega e contribúan a aumentar a resiliencia da Comunidade ao cambio climático e os seus efectos.
Ademais, o cumio acollerá varias reunións nas que Ángeles Vázquez coincidirá cos seus socios da Coalición Under2, iniciativa á que a Xunta se sumou precisamente hai un ano, no marco da COP26, co reto de asumir un papel máis activo no mantemento da temperatura global mediante a adopción de medidas para conter o quecemento do planeta.
Foron presentadas as xornadas Galicia Biodays, que buscan posicionar Galicia como un territorio de referencia en innovación biotecnolóxica no ámbito internacional. Este evento vaise celebrar os días 6 e 7 de maio no Auditorio Mar de Vigo, e permitirá reforzar a marca Galicia Calidade en biotecnoloxía, fomentar o intercambio de coñecemento e establecer novas colaboracións científicas, empresariais e institucionais. Está previsto que asistan máis de 1000 persoas de 9 biorrexións convidadas, con máis de 130 relatores.
Alfonso Rueda informou de que o Consello deu conta do inicio da tramitación do anteproxecto da que será 'a primeira Lei do terceiro sector da acción social de Galicia'. Unha norma que busca 'unificar nun único texto legal a regulación deste eido e recoñecer de xeito formal o seu traballo e o papel que xogan as entidades na sociedade galega'. A necesidade de aprobar esta lei xustifícase na importante presenza destas entidades en Galicia, preto de 1.500, -que constitúen 'unha auténtica rede de solidariedade', segundo resaltou a conselleira de Política Social e Igualdade, Fabiola García-, para apoiar as persoas e fogares máis vulnerables.
