jueves, 13 de agosto de 2026
A directora xeral de Formación para o Emprego e Orientación, Zeltia Lado, presentou hoxe en Pontevedra a Axenda Galega das Capacidades para o Emprego no marco do Salón da oferta e da educación e formación de Galicia -Edugal- que hoxe se inaugurou coa presenza tamén de Lado.
Na súa intervención, a directora xeral explicou que a Axenda Galega das Capacidades para o Emprego responde á estratexia da Comisión Europea que establece os obxectivos de capacitación e reciclaxe profesional para os próximos cinco anos a través de doce accións centradas nas capacidades para o emprego. Do que se trata é, en palabras de Lado, asegurar que as persoas teñan a formación axeitada para o traballo, definir ferramentas e iniciativas que apoien ás persoas na súa formación ao longo de toda a súa vida e establecer un marco de colaboración público-privada.
Deste xeito, naceu a Axenda Galega das Capacidades para o Emprego cun reto prioritario, segundo explicou a directora xeral, emparellar a demanda coa oferta do mercado laboral a través da implicación de gobernos, centros de formación, tecido empresarial e persoas traballadoras. Atopámonos ante un pacto social que xunta esforzos públicos e privados para ofrecer á cidadanía máis e mellores oportunidades de aprendizaxe, indicou.
O traballo feito ata o de agora a través desta planificación permitiu a detección de catro focos nos que se deben desenvolver accións de capacitacións: o dixital (análise de datos, programación e competencias básicas, entre outros); o industrial e da construción (manexo de maquinaria, soldadura, pintado ou fabricación); empresarial (xestión e liderado de proxectos e equipos, capacidades de venda, idiomas ou competencias brandas); e asistencial (coidados, atención ao cliente ou servizos).
Estas conclusións obtivéronse tras os primeiros pasos que se deron na execución desta estratexia, que foi poñer en marcha un traballo colaborativo co tecido produtivo, que permitiu a detección de necesidades concretas de capacitación para a súa posterior adaptación aos catálogos do sistema de formación para o emprego. Este labor abordouse en mesas de traballo específicas estruturadas por sectores (a construción; a Blue economy; a Green economy; a Silver economy; o sector da automoción e o aeronáutico; a loxística; o turismo, a hostalería e o comercio e a economía dixital), cunha mesa de traballo concreta na que se trataron as dificultades específicas en materia de formación para o emprego que afectan aos colectivos vulnerables.
Este traballo permitiu xa construír un Catálogo de Capacitación para o Emprego que inclúe as necesidades reais do tecido produtivo galego. Identificáronse, en concreto, 690 competencias con necesidades de formación, distribuídas en diversos eidos como a comunicación, a xestión e administración, o uso de maquinaria e a mobilización de cargas e o ámbito dixital e da TIC.
Traballamos para asignar os empregos dispoñibles ás persoas coas competencias axeitadas para seguir creando emprego e aumentar a produtividade e a competitividade do noso tecido empresarial, apuntou Lado.
Para rematar, a diretora xeral fixo fincapé na importancia da colaboración público-privada para garantir unha axeitada formación para o emprego e salientou tamén a necesidade de modernizar o Servizo de Emprego de Galicia, un eido no que traballa a Xunta para converter as necesidades das empresas en ofertas de traballo e xestionalas e difundilas a través das diversas canles do Servizo de Emprego. Para iso, a Administración autonómica asinou coa Confederación de Empresarios de Galicia (CEG) a súa adhesión a un sistema de difusión de ofertas do Servizo de Emprego de Galicia, un pacto orientado a obter candidaturas axustadas aos requisitos solicitados polas empresas. Estamos a obter unha información cualitativa moi valiosa sobre o comportamento do mercado de traballo de cara a deseñar políticas activas eficientes e utilizar a potencialidade do Serivzo de Emprego de Galicia para difundir esas vacantes e facilitar a súa cobertura, concluíu.
A Axenda Galega das Capacidades para o Emprego e a modernización do Servizo de Emprego, xunto co impulso ao emprendemento, a través da rede de polos de emprendemento de Galicia, forman parte da nova estratexia da Xunta no eido do emprego, Xempre Contigo.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
