viernes, 4 de julio de 2025
O vicepresidente primeiro e conselleiro de Economía, Industria e Innovación, Francisco Conde, presentou esta tarde en Monforte o Bono Activa Comercio, un programa a cuxa segunda edición xa se sumaron en tan só seis días máis de 3.000 comerciantes galegos, unha trintena na localidade lucense.
Conde, que visitou a Librería Agrasar, ademais de Ada Home e Calzados Losal, sinalou que a partir do próximo luns, 24 de outubro, e ata o 31 de decembro os clientes poderán descargarse a través da web bonosactivacomercio.gal bonos desconto por 30 euros, que poderán empregar nos comercios finalmente adheridos. O ano pasado realizáronse en Monforte preto de 2.400 descargas. Na provincia de Lugo mobilizáronse máis de 280.000 euros, con 814 establecementos adheridos e 28.835 beneficiarios
O orzamento que se destina á segunda edición desta iniciativa é de 5 millóns de euros, coa previsión de chegar a mobilizar 17 millóns en compras no comercio de proximidade de toda Galicia. A principal novidade deste ano é que se amplían os tramos de desconto e os importes, de tal xeito que para compras a partir de 20 euros e inferiores a 30, o desconto será de 5 euros; para compras a partir de 30 e inferiores a 50, será de 10 euros; e para os que superen os 50 euros o desconto será de 15 euros.
O Bono Activa Comercio ten un dobre obxectivo e así, por un lado busca axudar á economía das familias e aliviar o impacto da inflación na capacidade de gasto dos fogares galegos, e por outro, incentivar as compras no comercio de proximidade en datas clave para a actividade comercial.
O vicepresidente económico subliñou que se trata de dinamizar o consumo e de apoiar un sector moi importante para a economía e a calidade de vida das vilas e cidades galegas. Neste sentido, Conde apuntou que os esforzos da Administración autonómica se centran en promover a súa modernización e competitividade impulsando a dixitalización e comercio en liña e a sustentabilidade. Para eses e outros obxectivos, os orzamentos para 2023 destinan 24 millóns de investimento.
EuroPCom, a Conferencia Europea de Comunicación Pública, é a maior reunión anual de expertos en comunicación pública de Europa organizada polo Comité Europeo das Rexións en colaboración coa Comisión Europea, o Parlamento Europeo, o Consello, o Banco Europeo de Investimentos, o Comité Económico e Social Europeo e a Organización para a Cooperación e o Desenvolvemento Económicos. O evento ofrece unha plataforma para explorar as últimas tendencias, iniciativas e ideas no ámbito da comunicación pública. O director xeral de Relacións Exteriores e coa Unión Europea, Jesús Gamallo, participou nesta Conferencia organizada polo Comité Europeo das Rexións, e celebrada baixo o lema 'Máis alá das palabras. Unha historia de confianza'.
O Diario Oficial de Galicia publica hoxe a declaración de Ben de Interese Cultural da Rapa das Bestas de Sabucedo por considerar acreditado o seu valor sobranceiro como patrimonio inmaterial do pobo galego, ao tratarse dunha das festas máis antigas de Galicia que conta, como mínimo, con tres séculos de historia. Este recoñecemento supón a aplicación de inmediato do réxime de tutela da Lei de Patrimonio Cultural e, polo tanto, o maior nivel de protección. Esta distinción, que se suma á de Festa de Interese Turístico Internacional acadada en 2007, chega tras o visto e prace a este decreto por parte do Consello da Xunta este pasado luns, 30 de xullo, e logo de completarse o expediente administrativo, no que constan os dous informes preceptivos dos órganos consultivos favorables.
