viernes, 11 de septiembre de 2026
A conselleira do Mar, Rosa Quintana, expuxo hoxe no Parlamento de Galicia que o veto á pesca de fondo aprobado por Bruxelas en preto dun cento de áreas de augas comunitarias tería un impacto de ata 816 millóns de euros na economía galega. A titular de Mar salientou que esta estimación, realizada en base ás Táboas Input-Output da Pesca-Conserva Galegas 2019, mostra que esa prohibición da actividade pesqueira provocaría o colapso de moitas outras actividades marítimo-pesqueiras e da cadea mar-industria, ben pola caída loxística, o arrastre comercial ou a perda de demanda de bens.
A representante do Executivo galego lamentou que a Comisión Europea non realizase ningunha análise social e económica antes de adoptar esta medida, algo que sinalou como crucial dado que pode chegar a afectar a máis de 4.400 tripulantes, arredor do 40% do total na comunidade. Ese veto, incidiu, repercute directamente na actividade de máis de 200 barcos de capital galego, e pode afectar a outros 900 de xeito indirecto, co seu consecuente impacto nas vendas en lonxa, nos salarios das tripulacións e na prestación de bens e servizos, entre outros aspectos.
Rosa Quintana subliñou que con este veto o Executivo comunitario obvia que nas áreas acoutadas se viña pescando desde hai décadas, e mesmo séculos, sen que esa actividade afectase aos hábitats. Por este motivo, indicou que non tiña tanta urxencia adoptar unha medida deste calado e tan prexudicial para a frota, sen facer unha consulta previa seria ao sector e aos países afectados.
Nesta liña, puxo de relevo que os propios pescadores son conscientes das zonas en que hai hábitats sensibles e que evitan faenar nelas. Ao mesmo tempo, lembrou que este tipo de vetos poden ter efectos perniciosos provocando desequilibrios na cadea trófica deses ecosistemas mariños.
Recurso xudicial
A conselleira do Mar defendeu a necesidade de que España -actor privilexiado como país membro- interpoña un recurso xudicial contra este regulamento para evitar a súa aplicación, algo que a Xunta xa lle pediu ao Goberno central e que se fai máis urxente unha vez que a Comisión Europea rexeitou a paralización da súa entrada en vigor.
A titular de Mar salientou que o Executivo galego apoiará calquera actuación que se adopte neste sentido, tanto do Estado como do sector, aportando datos e argumentos técnicos e xurídicos que contribúan a lograr a suspensión temporal desta medida. En caso de que o Estado non presente recurso, aclarou, farao a Xunta malia que tería menos posibilidades de prosperar.
Rosa Quintana lembrou que esta prohibición -que se publicou no Diario Oficial da Unión Europea o pasado 19 de setembro e entrará en vigor o 9 de outubro- ten o seu xerme na Estratexia de Biodiversidade aprobada pola Comisión Europea en 2020. Desde entón Galicia presentou argumentos, mantivo distintas reunións e presentou informes ante a súa preocupación polo impacto que esta medida podía ter no sector. Pola contra, lembrou, Bruxelas non aportou os ditames nos que se sustenta o veto malia que lle foron solicitados pola Xunta en distintas ocasións.
Sen apoio maioritario
A representante do Executivo galego puxo de relevo que esta medida foi aprobada sen un acordo unánime nin maioritario da Unión Europea e que o Executivo comunitario decidiu seguir adiante cun resultado de non decisión. Este xeito de actuar, dixo, escapa do que é habitual no seo da Comisión e reiterou a necesidade de que esta prohibición se volva tramitar desde cero, posto que é nociva e está mal sustentada.
A conselleira sinalou que Bruxelas debería aprobar unha moratoria na entrada en vigor deste veto, o que abriría a porta a revisalo cunha achega rigorosa de datos e á adecuación do alcance do mesmo. De feito, dado que en novembro se vai revisar esta medida, a comunidade pide un período de gracia de dous meses pois retrasala dous meses non provocaría danos irreversibles nos hábitats, pero si pode provocalos na frota.
Mentres o Executivo comunitario non rectifique, engadiu, Galicia vai seguir traballando e buscando alianzas con outras comunidades e rexións pesqueiras co obxectivo de crear unha fronte común contra esta medida. Nesta liña, anunciou, este venres reuniranse en Santander representantes dos Gobernos autonómicos de Galicia, Asturias, Cantabria, País Vasco e Andalucía co fin de mostrar a súa unidade contra esta prohibición e traballar da man na defensa do sector.
Ao mesmo tempo, a comunidade vai iniciar contactos con outras rexións pesqueiras europeas afectadas e con representantes do Parlamento Europeo para tentar frear este despropósito, posto en marcha con datos parciais e sen actualizar. En paralelo, a Xunta solicitará unha xuntanza co comisario de Medio Ambiente, Océanos e Pesca, Virginijus Sinkevicius, e a directora xeral de Asuntos Marítimos e Pesca, Charlina Vitcheva, para expoñer as consideracións de Galicia sobre este asunto.
Rosa Quintana concluíu destacando que Bruxelas ten que ter claro que o sector pesqueiro galego non está en contra de que existan zonas protexidas, que xa existen, pero pide que se establezan a través do diálogo e de xeito sustentado e xustificado na ciencia, de forma equilibrada e proporcionada.
A reposición dálle continuidade á aposta do Centro Dramático Galego por recuperar títulos do seu repertorio que manteñen a demanda do público máis alá da súa primeira exhibición. No caso de 'A serie clopen', as 33 funcións ofrecidas no Salón Teatro durante a súa estrea en 2025 reuniron arredor de 5.500 espectadores, antes de iniciar unha serie de representacións por outros espazos de Galicia e de Portugal. O regreso aos escenarios prodúcese despois do recoñecemento acadado pola produción nos Premios de Teatro María Casares, pois obtivo dous galardóns: Natalia Pajarito, como mellor actriz protagonista, e Marta Alonso Tejada, pola dirección de movemento.
O sábado 12 de setembro chegará un dos pratos fortes do ciclo: A Movida Viguesa e a Homenaxe a Golpes Bajos. Esta histórica xornada supón o regreso aos escenarios de artistas fundamentais para comprender a historia musical de Vigo e de Galicia. Bandas e músicos que naceron na cidade e que, desde aquí, conquistaron o panorama nacional e mesmo internacional. Reunir nun mesmo escenario a Golpes Bajos, Semen Up, Miguel Costas de Siniestro Total, Killer Barbies e Stoned at Pompei é moito máis que un concerto: é unha homenaxe a unha xeración irrepetible e a unha cidade que marcou unha época dentro da música española.
