domingo, 11 de octubre de 2026
A conselleira de Promoción do Emprego e Igualdade, María Jesús Lorenzana, presidiu hoxe o pleno do Observatorio Galego da Violencia de Xénero, ante o que puxo en valor a continuidade do Pacto de Estado contra a Violencia de Xénero que reclamara Galicia e que acadou o pasado xullo o acordo unánime (a excepción de Asturias) de todas as comunidades. O Goberno galego está a tomar parte, tal e como relatou, no grupo de traballo para a configuración dun catálogo estatal de referencia de políticas e servizos para atender ás vítimas desta lacra.
A elaboración do catálogo, que se someterá a permanente actualización, constitúe para a Xunta un avance e exemplo da cooperación entre o Ministerio de Igualdade, as comunidades autónomas e as entidades locais a través da Federación Española de Municipios y Provincias (FEMP).
Tal e como lembrou Lorenzana, consolidar un marco de colaboración permanente que garanta a prórroga e permanencia das medidas derivadas do Pacto de Estado contra a Violencia de Xénero, foi unha das máximas coas que a comunidade galega defendeu ante a Conferencia Sectorial de Igualdade a continuidade desta ferramenta. O Pacto é un instrumento eficaz para coordinar as políticas para loitar contra esta lacra social, un eixo prioritario para a Administración autonómica galega que incrementou este ano o seu orzamento nun 22% ata os case 18 millóns de euros.
Galicia, a través do Pacto de Estado, está a xestionar 40 millóns de euros repartidos en cinco anualidades (2018-2022). Para este ano conta con preto de 8 millóns de euros.
Inserción laboral das vítimas
Na xuntanza do Observatorio de hoxe, por outra banda, a Consellería informou dos programas de inserción laboral para vítimas da violencia de xénero que desde 2019 ofrecen incentivos á contratación destas mulleres por parte dos concellos; e desde 2021 tamén a través das entidades e cooperativas sen ánimo de lucro. Un total de 400 traballadoras afectadas por esta lacra acadaron un contrato neste tempo.
A Xunta, tal e como se trasladou ao pleno, considera fundamental o acceso ou reincorporación das vítimas ao mercado laboral como medida para avanzar na súa recuperación e independencia socioeconómica.
I Plan galego contra a trata
Tamén se presentou ao Observatorio hoxe o I Plan galego contra a trata de seres humanos con fins de explotación sexual que terá vixencia entre os anos 2022 e 2024. Nace como un instrumento programático que aglutina as actuacións para loitar contra esta lacra social cun enfoque abolicionista da prostitución e de recoñecemento e defensa dos dereitos das vítimas, manifestou a conselleira.
O documento foi resultado do traballo colaborativo das entidades que integran a Rede Galega contra a Trata, e incluirá medidas para a prevención, educación e sensibilización social; para o reforzo da detección, identificación e proteccións ás vítimas; ou para o fornecemento dos recursos de atención integral, entre outras.
O Observatorio participará na supervisión da execución deste plan, polo que se constituirá un grupo de traballo que terá por obxectivo, por unha banda, impulsar accións para a eliminación da publicidade relacionada coa prostitución e co comercio sexual en medios informativos e soportes publicitarios e, por outra, a elaboración de estatísticas sobre a magnitude da trata como lacra na comunidade.
Na xuntanza de hoxe elevouse tamén a criterio dos integrantes do Observatorio a elaboración dunha declaración institucional con motivo da próxima conmemoración, o 25 de novembro, do Día Internacional para a Eliminación da Violencia contra a Muller e a proposta dun minuto de silencio para esa data en memoria das vítimas.
Foi presentada a novena edición de Intersección, Festival Internacional de Cine da Coruña, celebrada nos Cantones Cines. O festival desenvolverase do 13 ao 17 de outubro cunha programación que combina proxeccións, exposicións, formación e encontros profesionais arredor das novas linguaxes cinematográficas. Así, as seccións competitivas Galicia, Internacional e Fulgor achegarán ao público obras afastadas dos circuítos comerciais habituais e novas voces da creación audiovisual contemporánea. En concreto, a sección Internacional reúne 27 filmes procedentes de 22 países, entre os que figuran catro estreas mundiais, 17 en España e cinco en Galicia. As propostas exploran cuestións como a tecnoloxía, a memoria, o territorio e a identidade desde linguaxes e xeografías diversas.
A Real Academia Galega de Ciencias (RAGC) celebrou en Santiago, no Salón Nobre do Colexio de Fonseca, o acto do Día da Ciencia en Galicia, no que se homenaxeou á oceanógrafa Aida Fernández Ríos (Vigo, 1947 - Moaña, 2015) como Científica Galega 2026. Ademais, entregáronse as Medallas de Investigación a cinco científicas e científicos da nosa comunidade. O presidente da Academia destacou que 'Aida Fernández Ríos foi unha investigadora capaz de identificar problemas relevantes e de situalos nun contexto internacional, converténdose nunha científica respectada moito máis alá de Galicia.
