viernes, 13 de noviembre de 2026
O secretario xeral de Política Lingüística, Valentín García, participou hoxe na Facultade de Linguas Modernas da Universidade de Varsovia no acto de inauguración do XIII Congreso da Asociación Internacional de Estudos Galegos (AIEG) Abrindo rutas, expandindo camiños. Novas perspectivas e interseccións nos estudos galegos.
O representante da Xunta de Galicia destacou o importante papel deste congreso que impulsa a internacionalización da nosa lingua e da nosa cultura e dota de dinamismo e modernidade os cada vez máis numerosos centros de estudos galegos que están espallados polo mundo enteiro.
O obxectivo deste congreso, que se levará a cabo do 21 ao 24 de setembro, é explorar como os traballos de investigación innovadores na área dos estudos galegos están a fomentar o diálogo entre disciplinas académicas e entre representantes da cultura. Para iso contará con distintas sesións de comunicacións, paneis temáticos, obradoiros, mesas redondas, entrevistas e sesións culturais, entre outras actividades.
A intención é identificar códigos discursivos sobre conceptos como a internacionalización, xa que os estudos galegos teñen un perfil cada vez máis aberto e multidisciplinar e é necesario promover colaboracións, intercambios culturais e difusión da produción científica, literaria e cultural. Por outra banda, neste congreso abordaranse as conexións entre os estudos galegos e os doutras culturas non hexemónicas.
Así mesmo, impulsaranse achegamentos aos estudos poscoloniais, feministas, raciais e da sexualidade. Por último, afondarase na importancia de aumentar a presenza dos estudos galegos en diferentes contextos tanto académicos como institucionais.
Mostra itinerante Galicia imaxinada nas revistas da emigración
O secretario xeral de Política Lingüística, Valentín García, tamén interveu na presentación da exposición Galicia Imaxinada nas revistas da emigración, comisariada por Chus Martínez.
Trátase dunha mostra itinerante que, organizada polo Consello da Cultura Galega coa colaboración do Instituto Cervantes de Varsovia, retrata a Galicia dos emigrantes a través de 20 paneis que presentan a influencia da emigración na creación da imaxe de Galicia no século XIX. Poderá visitarse ata o 5 de outubro no Instituto Cervantes de Varsovia.
O 68,7 % da poboación galega de 16 a 74 anos dispón de competencias dixitais básicas ou avanzadas, fronte ao 61,4 % de 2025, o que supón un incremento relativo do 11,9 %. O 42,6 % da poboación galega de 16 a 74 anos ten competencias dixitais avanzadas, cinco puntos porcentuais máis ca en 2025, e o 26,1 % ten competencias básicas. Son datos publicados hoxe polo INE no informe sobre equipamento e uso das TIC nos fogares, analizados polo Observatorio da Sociedade da Información da Axencia para a Modernización Tecnolóxica de Galicia (Amtega).
Foi presentada na Cidade da Cultura a iniciativa 'Circo no Camiño', que celebrará entre o 12 de novembro e o 6 de decembro a súa primeira edición, na que contará con artistas nacionais e internacionais. A proposta Circo no Camiño quere achegar as artes escénicas a diferentes localidades galegas relacionadas co Camiño de Santiago. Para isto avanza unha programación variada de espectáculos de circo, maxia, música, acrobacias, humor e animación de rúa dirixidos a todos os públicos, que se desenvolverán tanto nunha gran carpa como nas rúas.En concreto, a programación desenvolverase en catro localidades galegas: Verín, Lalín, A Estrada e Santiago de Compostela, onde se pechará a programación, entre os días 3 e o 6 de decembro.
