sábado, 20 de junio de 2026
Actualmente, as empresas xa inscritas, máis de 100, atópanse nunha primeira fase de diagnose para detectar os puntos fortes e aquelas áreas de mellora en materia de sostibilidade, ademais de coñecer en profundidade o seu modelo de negocio para poder aliñalo cos criterios e obrigas ASG (Ambiental, Social, e de bo Goberno).
As pemes interesadas en participar aínda están a tempo de facelo, pois o prazo de inscrición en Responsabilízate continúa aberto na sede electrónica da Xunta ata completar as 180 prazas previstas. Aquelas empresas que queiran ampliar información poden facelo a través da oficina técnica do programa no correo electrónico responsabilizate.emprego.igualdade@xunta.gal ou no número de teléfono 674 241 281.
Responsabilízate diríxese ás pequenas e medianas empresas que non superen os 50 millóns de euros de volume de negocio anual ou ter balance anual inferior a 43 millóns de euros. Con esta iniciativa, a Xunta reforza o seu compromiso no apoio ao tecido empresarial galego impulsando a súa competitividade nun contexto de transformación no que as prácticas como a xestión responsable das persoas, a adaptación a unha economía baixa en carbono, ou o desenvolvemento de condutas éticas na cadea de subministración, son claves para o posicionamento das empresas.
A aplicación de criterios de RSE reporta para a empresa beneficios tanto internos como externos. Dentro do seu propio funcionamento, incrementan a súa capacidade innovadora, a eficiencia de procedementos e baixa dos custos, unha maior xestión de crises ou a fidelidade tanto do persoal como da clientela, entre outros. Cara ao exterior, contribúese a mellorar a reputación das firmas, así como a abrir novas oportunidades de negocio, reducir riscos e mellorar as relacións coas comunidades locais.
Ademais, a Xunta pretende que as pemes se anticipen ás esixencias europeas en materia de igualdade laboral, transparencia, economía circular, dereitos humanos ou loita contra o cambio climático desde o mundo da empresa, a través do programa formativo de 20 horas ao que accederán as empresas beneficiarias de Responsabilízate a partir de outubro. Dentro desta formación tamén se inclúen cinco horas de asesoramento personalizado por parte de expertos para desenvolver unha folla de ruta.
A través deste programa, o Goberno galego persegue que as empresas sexan máis competitivas, facilitando a súa adaptación ás esixencias dos grandes clientes, do mercado de consumo e das novas obrigas sociais e administrativas, ao mesmo tempo que retén o talento empresarial na comunidade.
O programa formativo Medrando Xuntas permitiu que as mulleres participantes traballasen habilidades clave como a comunicación, a organización, o liderado, a toma de decisións, a participación interna e a mellora da confianza profesional, ao tempo que se fomentou a creación dunha rede de mulleres que se apoian, colaboran e comparten recursos e que se deron a coñecer proxectos que están a transformar a economía. En primeiro lugar, Medrando Xuntas contou cun programa formativo para reforzar a súa participación nas entidades de economía social. En segundo lugar, a formación para directivas estaba dirixida a mulleres con responsabilidades de dirección ou proxección cara ao liderado.
Unha alianza entre o Instituto Tecnolóxico de Galicia (ITG) e as compañías Naturgy InnovaHub e Flythings Technologies desenvolverá unha plataforma enerxética que transformará residuos en produtos de alto valor engadido. Neste caso transformaranse residuos como lodos de depuradora, restos orgánicos e biomasas, en produtos de alto valor engadido como biocombustibles (hidrochar e biometano) e vectores enerxéticos sostibles (hidróxeno e syngas). Para iso, a nova unidade mixta combinará distintas tecnoloxías e incorporará sistemas híbridos de almacenamento con baterías e supercondensadores, ademais de empregar ferramentas como Internet das cousas, os xemelgos dixitais e a aprendizaxe automática.
