jueves, 13 de agosto de 2026
Galicia, ademais creou emprego con respecto a xuño. As afiliacións creceron na comunidade galega (+0,92%), mentres que caeron no Estado (-0,04%). En termos absolutos, é a terceira comunidade con maior incremento das cotizacións. A contratación, pola súa banda, aumentou en xeral nun +7,94%, mentres que no Estado descendeu (-6,41%).
Na evolución anual, o paro baixou nun 7,95%, o que supón 12.084 persoas menos en situación de desemprego. Descendeu nas principais variables: nas catro provincias galegas e nas sete grandes cidades, así como en todos os sectores económicos, liderando a baixada a industria cun -15,96%. Lado sinalou que é o cuarto mes consecutivo no que a industria lidera a caída do paro con respecto a 2021. Por colectivos, o desemprego diminúe nos que son considerados prioritarios nas políticas activas de emprego da Xunta, especialmente entre os parados de longa duración (-19,88%) e tamén entre os menores de 30 anos (-10,14%), entre as mulleres (-7,84%) e maiores de 44 anos (-4,96%). Entre as mulleres menores de 30 anos, ademais, o paro cae máis do dobre que entre os homes.
As cotizacións aumentan tamén na evolución anual, nun +2,12%. Galicia continúa a superar a barreira do millón de persoas afiliadas á Seguridade Social con 1.058.193, acadando un nivel superior ao reflectido hai 13 anos.
Xempre
A directora xeral destacou que é prioritario para a Xunta continuar impulsando e xerando en Galicia máis emprego de calidade, apoiando o emprendemento e revolucionando a formación para o emprego. Neste senso, referiuse á nova estratexia de Emprego da Xunta, Xempre, baseada en dous elementos principais, traballar coas capacidades das persoas e a través da colaboración público privada. Baixo esta Estratexia e estes dous elementos, Lado explicou que o Goberno galego busca revolucionar o emprego en Galicia a través da Axenda Galega de Capacidades para o Emprego e a Rede de Polos de Emprendemento e Apoio ao Emprego.
No marco da Axenda de Capacidades, explicou que se crearon nove mesas de traballo que avaliaron, da man do tecido empresarial, as cualificacións que precisan as empresas galegas para formar ás persoas sen emprego e ocupadas nesas capacidades, adaptando a formación para o emprego e optimizándoa; e, doutro lado, indicou que a Administración autonómica está a levar a cabo unha renovación íntegra do Servizo de Emprego de Galicia coa implantación, entre outras actuacións, dunha nova ferramenta informática que permitirá empregar a intelixencia artificial para casar oferta e demanda; e a incorporación de 136 orientadores á rede de emprego para seguir asesorando á cidadanía en materia laboral.
A Rede de Polos de Emprendemento e Apoio ao Emprego, vinculado ao territorio, ofrecerá, pola súa banda, un maior e mellor contacto á cidadanía coa rede autonómica de emprendemento e a oferta laboral de Galicia para facilitar aos galegos e ás galegas o acceso a todos os instrumentos que están dispoñibles en materia de emprego e emprendemento. Para impulsar o emprendemento, a directora xeral ademais, puxo en valor as axudas directas ás persoas autónomas, que xa suman este ano máis de 40 millóns de euros.
Para rematar a súa intervención, apuntou que os colectivos con máis dificultades para atopar un emprego tamén son prioritarios para o Goberno galego para os que conta cos Plans Emprega dirixidos á mellora da formación e a contratación das mulleres, da mocidade e das persoas con discapacidade e/ou en risco de exclusión social. Son preto de 130 millóns de euros para apoiar a máis de 16.500 mulleres; máis de 2.100 mozas e mozos; e preto de 6.400 persoas con discapacidade e/ou en risco de exclusión social.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
