miércoles, 12 de agosto de 2026
Esta nova quenda de programación implicará a contratación de 90 colectivos creadores, dos cales 75 pertencen ao ámbito da escena e os 15 restantes, ao mundo da música. Varias compañías verán incorporados os seus espectáculos no cartel definitivo que a Rede Galega de Teatros e Auditorios ofrecerá ata final de ano a raíz da súa participación na última edición de Galicia Escena PRO, o mercado galego de artes escénicas organizado de forma conxunta pola Consellería de Cultura, Educación, FP e Universidades e a asociación Escena Galega. A este encontro profesional asistiron 56 responsables de festivais escénicos, de circuítos e de programacións culturais municipais, gran parte deles adheridos á Rede Galega de Teatros e Auditorios.
O cartel semestral arrincará esta mesma noite en Foz da man da compañía Píscore, que ofrecerá ás 21,00 h. no patio do Colexio nº1 a súa obra escénico-musical para o público familiar Concerto Con Fusión. Será a primeira das 14 actuacións que programa ao longo deste segundo semestre a Sala Baía do municipio focense, que é o terceiro concello con maior número de actuacións previstas até decembro tras as 19 coas que conta o Auditorio Municipal de Vigo e as 18 que ofrecerá A Coruña nos seus escenarios do Fórum Metropolitano e do Teatro Rosalía Castro.
Máis de 100 espectáculos
De todas as formacións artísticas contratadas, a gran maioría ten a súa sede en Galicia e, por xéneros, o teatro para adultos rexistra a maior presenza no cartel ao figurar en máis da metade das actuacións. Dos 110 espectáculos que se inclúen na programación que arrinca hoxe, o que máis xirará polo circuíto de exhibición que coordina a Xunta será Morte accidental de un anarquista, obra de Talía Teatro que adapta o coñecido texto de Darío Fo. Poderase ver ata en 11 ocasións neste semestre. Pola súa banda, Galitoon ofrecerá oito actuacións coa súa peza Golulá, produción para o público familiar de técnica mixta que conxuga o teatro de actor coas marionetas de gran formato.
Continente María, coprodución de Ainé co Centro Dramático Galego que retrata a vida de María Casares no seu centenario, visitará sete escenarios da Rede Galega de Teatros e Auditorios. Do mesmo número de representacións disporá Cigarreiras, montaxe na que Cándido Pazó adapta a novela de La Tribuna, de Pardo Bazán, e coa que Contraproducións se fixo este ano co premio María Casares ao mellor espectáculo.
Heredeiros da Crus, Xisco Feijoo, Pabo Sanmamed Trío ou A Banda do Verán será algúns dos grupos que ofrecerán concertos dentro deste circuíto de programación, mentres que as funcións de danza correrán a cargo de nomes como Marta Alonso Tejada, Funboa Escénica, Licenciada Sotelo ou Paula Quintas Cía. A Rede Galega de Teatros e Auditorios tamén amosará neste segundo tramo de programación espectáculos de maxia da man de artistas como Cayetano Lledó e de novo circo con formacións como Artefeito ou Hípica Celta.
A programación da Rede Galegas de Teatros e Auditorios sumase así a outras que xa están en marcha este verán ou que proximamente iniciarán percorrido por Galicia promovidas pola Xunta a través da Axencia Galega das Industrias Culturais, tales como Cultura no Camiño, Danza 3, FEST Galicia ou a Rede Galega de Música ao Vivo.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
