sábado, 7 de noviembre de 2026
Segundo apuntou o vicepresidente segundo da Xunta, Galicia e o Norte de Portugal fortalecerán as boas relacións e a colaboración destes anos no ámbito da Agrupación Europea de Cooperación Territorial (AECT) da Eurorrexión Galicia-Norte de Portugal coa finalidade de mellorar a calidade de vida dos cidadáns a ambos lados da raia.
Entre os asuntos tratados, a Xunta e o Norte de Portugal coinciden en avanzar na preparación da participación da Eurorrexión en proxectos conxuntos cos que optar aos fondos do Programa Interreg España-Portugal (POCTEP) no período 2021-2027.
A aprobación do novo programa está prevista para finais deste ano coas primeiras convocatorias. Este POCTEP 2021-2027 terá como eixos traballar por unha Europa máis intelixente, verde e baixa en carbono, social e próxima e cunha maior cogobernanza.
Entre as súas prioridades en torno as que deberán xirar as iniciativas presentadas inclúense as relacionadas coa competitividade, a dixitalización e o I+D+i das empresas; a especialización intelixente; a transición ecolóxica, o cambio climático e a biodiversidade; a despoboación e o acceso a servizos, o desenvolvemento integrado e sostible e a gobernanza.
Galicia e o Norte de Portugal esperan manter a posición de liderado do anterior período entre 2014 e 2020, no que se captaron un total de 135 millóns de euros para a posta en marcha de 80 proxectos.
En liña co POCTEP, a Xunta e a CCDRN adiantáronse coa aprobación o pasado xullo do Plan de Investimentos Conxuntos da Eurorrexión Galicia-Norte de Portugal, como un instrumento de planificación conxunta dos investimentos da Eurorrexión que no próximo período financeiro apostará pola innovación, a ecoloxía, a cohesión e o desafío demográfico.
Cómpre lembrar que no marco da cooperación transfronteriza púxose en marcha o Plan de Reactivación da Cooperación de Proximidade na Fronteira do Norte de Portugal con Galicia. O texto foi elaborado pola AECT da Eurorrexión en coordinación con todos os actores da cooperación transfronteiriza para dar resposta aos efectos da covid e do peche de fronteiras durante o confinamento. Así, presentáronse 11 iniciativas por 29 millóns de euros que o Goberno galego trasladou ao Executivo central para a súa incorporación no Plan de Recuperación, Transformación e Resilencia de España nos fondos Next Generation.
Na reunión de hoxe abordáronse ademais as propostas consensuadas entre a Xunta e o Norte de Portugal que se avaliaron no Cumio Ibérico celebrado o pasado outubro entre os gobernos de España e Portugal. Nesta liña, ambas institucións seguen a reclamar un a finalización do tren de alta velocidade entre Vigo e Porto e a construción da saída sur de Vigo para prolongar esta liña, así como a conexión internacional por autovía entre Galicia e o noreste portugués.
Balance AECT
Por outra banda, a Eurorrexión Galicia-Norte de Portugal publicou este ano novas convocatorias do programa de mobilidade académica Iacobus para estadías, publicacións científicas e patentes. Tamén continúa a fomentar o intercambio no ámbito cultural a través do proxecto Nortear e no turístico co programa Facendo Caminho mediante a consolidación das rutas do Camiño de Santiago na Eurorrexión.
Nos proxectos levados a cabo destacan tamén os Job Days cos que fomentar a mobilidade e o emprego na Eurorrexión ou o programa B-Solutions con proxectos destinados a identificar obstáculos á cooperación transfronteiriza.
A AECT da Eurorrexión ten como finalidade principal facilitar e fomentar a cooperación territorial e institucional para axudar a eliminar as barreiras físicas e burocráticas e contribuír a mitigar as fronteiras co funcionamento dunha Eurorrexión transfronteiriza efectiva.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
