sábado, 19 de septiembre de 2026
O sistema educativo galego conta cunha rede de preto de 4.000 profesionais para a atención á diversidade en centros públicos, composta por especialistas en Audición e Linguaxe, Pedagoxía Terapéutica, coidadores e demais profesionais específicos. Así mesmo, a Consellería de Cultura, Educación e Universidade atende a diversidade do alumnado a través de diferentes iniciativas como os contratos-programa, que contan cunha liña específica de fomento da inclusión nos centros educativos.
Por outra banda, ao abeiro do Plan LÍA (Lectura, Información e Aprendizaxe 2021-2025), a folla de ruta que guía a actividade das bibliotecas escolares galegas, desenvólvese o programa Biblioteca inclusiva, a través do que o pasado curso 783 centros de infantil e Primaria recibiron unha dotación extraordinaria para fondos inclusivos, que se sumou a outra dotación extraordinaria para adquirir materiais e recursos inclusivos nos centros de Educación Especial. Ademais, está previsto poñer en marcha novas iniciativas que promovan a accesibilidade a estes espazos a todos os membros da comunidade educativa.
Así mesmo, Galicia conta con diversas ferramentas para a prevención, detección precoz e tratamento da diversidade, como son os protocolos específicos dirixidos a favorecer a inclusión educativa de alumnado con trastorno por déficit de atención e hiperactividade, con trastorno do espectro de autismo (TEA), con discapacidade auditiva ou para a intervención psicoeducativa da dislexia e outras dificultades específicas da aprendizaxe.
No que atinxe aos recursos, ademais de facilitar os que cada centro precisa en función das necesidades de cada alumno, dáse cobertura de transporte a 363 alumnos e de comedor a 498 estudantes de centros de educación especial que non son públicos a través de convenios con diferentes entidades.
Estratexia Galega de Inclusión Educativa
O Goberno galego está a preparar a futura Estratexia de Inclusión Educativa co fin de avanzar na consolidación dunha escola plenamente inclusiva na que se dea resposta ás necesidades e ás capacidades do conxunto do alumnado. Para tal fin, a Consellería de Cultura, Educación e Universidade manterá unha colaboración estreita e un diálogo aberto coas familias, entidades e colectivos implicados e cuxo resultado final determinará as liñas de actuación neste ámbito para os vindeiros anos.
Medio milleiro de investigadoras e investigadores e máis de 150 actividades científicas nas sete cidades galegas: Vigo, Ourense, Pontevedra, Santiago, A Coruña, Ferrol e Lugo. Así se celebrará en Galicia a sexta edición da Noite Galega das Persoas Investigadoras, G-Night 2026, unha actividade na que a comunidade científica galega une talento e esforzos co obxectivo de achegar a ciencia á cidadanía e espertar vocacións científicas, ao tempo que se ofrecen propostas de lecer científico, cultural e educativo para toda a familia.
A Xunta de Galicia reclama ao Goberno central medidas estruturais de apoio ao sector agrogandeiro. Do mesmo xeito, esíxese que se teña en conta a realidade de cada territorio á hora de levar a cabo estas actuacións, que deben executarse de xeito urxente. Así o trasladou a conselleira do Medio Rural, María José Gómez, na Conferencia Sectorial celebrada en Madrid, na que se dirixiu ao ministro de Agricultura, Pesca e Alimentación, Luis Planas, para facer estas reclamacións. Alí, reafirmou tamén o compromiso do Executivo galego con este sector.
