lunes, 6 de abril de 2026
Marzo comezou cunha primeira xornada na que se rexistrou a visita dunha fronte fría, que deixou chuvias en toda a Comunidade, e a derradeira xornada tamén quedou marcada polo paso dunha fronte fría, con chuvias xeneralizadas e unha importante baixada das temperaturas.
Asemade, Galicia, desde o día 7 ata o 14, rexistrou a chegada de borrascas e frontes de xeito continuo que deixaron chuvias intensas ao longo deste período e ventos que por momentos sopraron con intensidade.
Ademais, o día 15 a borrasca Celia achegou unha masa de aire de orixe norteafricano que, ademais de facer ascender as temperaturas, deixou unha importante entrada de po sahariano que se converteu no fenómeno máis salientable do mes.
Temperatura
As temperaturas comezaron o mes cunha clara anomalía negativa, pero foron recuperando parte do perdido na segunda quincena, aínda que a presenza de nubes medias e altas fixo que os valores nestes días non fosen moi elevados.
O valor medio da temperatura máxima de marzo foi de 13.8 ºC, e foi nas localidades limítrofes co Miño ourensá nas que se rexistrou o valor máis alto: 18.6 ºC. En canto á temperatura media mínima, situouse nos 4.7 ºC, sendo o rexistro máis baixo os 1.8 ºC do macizo de Manzaneda e de Pena Trevinca.
Precipitación
Segundo os datos rexistrados, no mes de marzo a precipitación media acumulada foi de 126 L/m2. Os rexistros máis elevados situáronse nos 285 L/m2 na comarca do Sar, seguidas polas do Xallas e A Barcala; o contrapunto atopouse nalgunhas localidades de Valdeorras, con valores en torno aos 20 L/m2.
Novo modelo de predición de MeteoGalicia
MeteoGalicia -o organismo referente climatolóxico e científico, a nivel nacional e europeo- conta cun novo modelo de predición meteorolóxica, que ofrece unha resolución para 1 quilómetro fronte aos 4 quilómetros do anterior.
Isto significa que se disporá de información sobre a previsión do tempo, as precipitacións, a temperatura ou o vento cun maior nivel de detalle, ao tempo que se melloran os prognósticos de factores determinantes a nivel local.
Esta ferramenta será de utilidade para o cidadán en xeral e tamén para o tecido económico-empresarial, xa que contarán con información máis detallada e precisa á hora de coordinar as súas tarefas produtivas coa meteoroloxía e planificar os traballos diarios ou semanais.
Foi presentada a novena edición do Festival Clasclás que, baixo lema de 'Paixón', se vai celebrar, do 20 ao 27 de xuño, en Vilagarcía de Arousa, cunha ambiciosa programación que aposta pola vangarda e a ciencia. Así, este certame convértese nunha das grandes citas internacionais da música clásica, cunha programación que abrangue desde a excelencia da Orquestra Sinfónica de Galicia e da música de cámara ata o virtuosismo de solistas chegados de diferentes partes do mundo. O evento inclúe a celebración dun 'concerto inmersivo' para conmemorar a eclipse solar, que terá lugar en agosto.
O presidente da Xunta destacou que 'as medidas fiscais aprobadas polo Goberno galego e consolidadas dende o ano 2022 permitirán a cada contribuínte da comunidade aforrar unha media de 476 euros na declaración da renda'. Así mesmo, lembrou que na campaña deste ano 'seguen vixentes as medidas de alivio fiscal' postas en marcha pola Administración autonómica nos últimos anos. Así, os contribuíntes galegos volverán aplicar a tarifa deflactada nos tres primeiros tramos autonómicos do IRPF no ano 2023 e a rebaixa do primeiro tramo e do incremento dos mínimos persoal e familiar.
