jueves, 15 de octubre de 2026
O informe sinala que "o PIB real está aínda 2,3 puntos por baixo do nivel pre-crise, pero a fenda é maior no conxunto da economía española (3,8 puntos)" e que o crecemento do PIB real en Galicia e España caracterízase por unha achega positiva tanto na demanda interna como externa. Os expertos do Foro Económico salientan a maior contribución da demanda externa no segundo semestre do ano e apuntan que no cuarto trimestre a demanda externa achega 4,1 puntos ao crecemento agregado, fronte aos 1,8 puntos na economía española. Porén compre salientar o forte diferencial negativo na evolución do investimento, que medra en Galicia un 1,1% fronte ao 6,8% de media en España, engaden.
En canto á oferta, o sector servizos é que representa segundo os datos do Foro Económico de Galicia maior actividade, un 6,6% máis que no conxunto do estado. Tamén a industria manufactureira medra un 6,1% na comunidade autónoma no último ano, dúas décimas máis que España. Pola contra o sector primario contráese un 0,5% e a construción un 2,4% respecto ao ano precedente. O dinamismo do tecido produtivo galego segue a ser inferior á media do estado, afirman os autores do documento, indicando como cómpre insistir na menor produtividade do sector manufactureiro en relación ao conxunto do estado.
Mercado de traballo
No que atinxe ao mercado de traballo, o informe destaca un bo comportamento interanual tanto no caso dos homes como das mulleres pero, advirte, a mellora nas cifras da ocupación deben ser matizadas xa que Galicia mantense entre as comunidades autónomas con menores taxas de actividade e ocupación. Os datos da EPA, detállase no texto, reflicten que a creación de emprego rexistra maior intensidade no caso das mulleres que dos homes. Incrementase o emprego en persoas con estudos superiores, no sector servizos, asalariados e empresarios con asalariados e en persoas maiores de 45 anos, apuntan os expertos. No que atinxe ao desemprego o documento salienta que o principal aspecto negativo é o forte incremento do desemprego de longa duración, indicando que os menores de 25 anos, estranxeiros e persoas con estudos primarios son os colectivos que máis dificultades atopan para conseguir emprego.
O Foro Económico de Galicia é unha plataforma de transferencia de coñecemento das universidades e empresas galegas á sociedade. Está integrada por profesorado das tres universidades galegas, empresariado e directivos de referencia e xornalistas especializados en divulgación económica, agrupando a un total de máis de 60 persoas referentes para a análise e confección de propostas para a economía galega.
Un total de cinco candidaturas galegas optan como finalistas aos XIX Premios Nacionais de Artesanía, convocados polo Ministerio de Industria, Comercio e Turismo. Galicia convértese así na comunidade con máis finalistas, con candidaturas en catro das cinco categorías. En concreto, os ceramistas Barreiros Artesanía e a deseñadora e redeira Amalia Puga optan ao Premio Produto, mentres que Sandra Vilas é candidata por segundo ano consecutivo ao Premio Emprendemento. Na categoría Promociona para Entidades Privadas, resultou finalista a asociación APAMP e a súa marca A Casa Rodante; e no Promociona para Entidades Públicas, é candidata a Fundación Pública Artesanía de Galicia.
O conselleiro de Presidencia, Xustiza e Deportes, Diego Calvo, anunciou que a Xunta vai desenvolver o título II da Lei de Xuventude de Galicia' para mellorar a calidade dos servizos que se prestan á mocidade galega con medidas para 'incrementar o número de monitores nos campamentos ou flexibilizar os requisitos para poder exercer este traballo'. Así se recolle no proxecto de decreto co que se actualiza o segundo título desta normativa que foi avaliado hoxe no Consello da Xunta e que se publicará nos vindeiros días no Diario Oficial de Galicia 'despois dun longo proceso de participación e diálogo cos axentes implicados' a través de distintos espazos de escoita activa.
