domingo, 8 de noviembre de 2026
A directora da Axencia Galega de Innovación (Gain), Patricia Argerey Vilar, destacou hoxe na súa intervención no acto de inauguración de BioGalicia Summit que o impulso á biotecnoloxía como sector estratéxico para Galicia, así como o apoio ao emprendemento innovador, son dous ámbitos prioritatios para as políticas de I+D+i da Xunta de Galicia.
Argerey puxo en valor a importancia da biotecnoloxía para Galicia como motor capaz de xerar valor económico e social, contribuíndo a dinamizar sectores tradicionais, así como abrindo as portas a outros de elevado perfil tecnolóxico. A directora da Axencia tamén destacou o potencial do ecosistema biotecnolóxico galego, novo pero sólido e ben cohesionado, que medra moi rápido, composto por centros de investigación e universidades con grandes capacidades en investigación, dous clústeres, que integran industrias tractoras e consolidadas con empresas emerxentes, e un hub de innovación dixital, DataLife.
Neste contexto, Argerey lembrou que a Xunta ten en marcha xunto co sector a Estratexia de Consolidación da Biotecnoloxía ata 2025 co obxectivo de situar a Galicia como unha das principais rexións biotecnolóxicas a nivel internacional. Un dos eixos centrais desta estratexia é xerar negocio e consolidar tecido empresarial arredor do Polo de Innovación Biotecnolóxica da Sionlla.
Argerey lembrou tamén que Galicia participa no Plan Complementario de Biotecnoloxía aplicada á Saúde impulsado polo Ministerio de Ciencia e Innovación, xunto a outras catro comunidades autónomas, para desenvolver ferramentas de diagnóstico, pronóstico e terapias de medicina personalizada.
Por último, a directora da Axencia Galega de Innovación explicou o modelo propio de apoio ao emprendemento da Xunta de Galicia, que busca impulsar o desenvolvemento de proxectos en fases temperás e promover a creación de empresas de base tecnolóxica. Dentro deste modelo, atópase a rede de Business Factories, aceleradoras especializadas en sectores estratéxicos para Galicia, así como o apoio a BioIncubatech e o programa de transferencia de coñecemento Ignicia. Tamén destacou o papel dos fondos de capital risco no apoio ás spin-offs do sector bio e farma.
BioGalicia Summit é un encontro de carácter internacional centrado no sector da biotecnoloxía e organizado pola incubadora de alta tecnoloxía BioIncubaTech, liderada pola USC en colaboración coa Cámara de Comercio de Santiago de Compostela e Uninova e co apoio da Xunta de Galicia e a Fundación Incyde.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
