lunes, 7 de julio de 2025
Nesta última xornada no Pazo da Cultura de Pontevedra intervén por parte da Xunta de Galicia o secretario xeral de Política Lingüística, Valentín García, para explicar o Proxecto Nós de Intelixencia Artificial ao servizo da lingua galega. Ademais a directora-xerente da Cidade da Cultura, Ana Isabel Vázquez Reboredo, para dar conta do programa de exposicións do museo e Jacobo Sutil, director da Axencia Galega das Industrias Culturais (Agadic), encargado de presentar Rapa, a nova serie que a produtora Portocabo está a rodar en Galicia.
O marabilloso Camiño de Inverno e concerto da Orquestra Sinfónica
Baixo o título O marabilloso Camiño de Inverno, a artista Ana Inés Jabares-Pita transformará o Hall de Tirantes do Museo Centro Gaiás cunha composición de bólas de neve a escala humana con varias escenas representativas deste itinerario xacobeo, facendo un percorrido con paradas en lugares emblemáticos. Estas bólas, entre as que poderán pasear os visitantes coma quen se somerxe nun bosque, representan unha paisaxe máxica ambientada tamén con puntos de luz. A árbore contará cunha decoración na mesma liña, con bólas transparentes cun contido que simboliza as etapas do Camiño.
Ana Inés Jabares-Pita é unha escenógrafa, deseñadora e dramaturga galega recoñecida internacionalmente. Entre outros, gañou o premio Linbury de deseño escénico en 2013 polo deseño de The Drivers Seat para o National Theatre of Scotland.
Tras a inauguración do espazo do Museo Centro Gaiás e o acendido das luces exteriores o venres 17, o visual dará paso ao sonoro. A Orquestra Sinfónica de Galicia ofrecerá un concerto de Nadal ás 19,00 horas co acompañamento da cantaora Marina Heredia, que atesoura unha extensa carreira de colaboracións con reputados artistas flamencos. Da man do seu director asociado, José Trigueros, a agrupación interpretará durante unha hora e media obras de Federico García Lorca e Manuel de Falla. As entradas para a actuación, que ten un custo de 5, estarán á venda proximamente en Ataquilla.com.
A cativada poderá gozar dun gran Circo de Nadal
A compañía La Fiesta Escénica levará ao Gaiás o 3 de xaneiro un gran Circo de Nadal con espectáculos aéreos, acrobacias e os seus osos polares animatrónicos. A programación complétase cunha función de maxia, Ilusións do Camiño, a cargo de Magia en la Manga, fixada para o día 27 de decembro. Estes magos tamén impartirán obradoiros para a cativada nas Tardes de maxia os días 22, 23, 28 e 29 de decembro. As entradas para as distintas propostas poderán adquirirse en Ataquilla.com a prezos que oscilan entre os 3 e os 5 euros. Ademais, o día 18 de decembro a Biblioteca de Galicia convida de balde (previa inscrición en cidadedacultura.gal) a gozar cun teatriño de elfos coa obra Os trasnos do Nadal.
O complexo do Gaiás quedará ambientado no seu exterior cun deseño de luces que será visible desde diversos puntos da cidade de Santiago. O alumeado, que permanecerá acendido desde o día 17 decembro, representará un camiño de estrelas que guiarán ao visitante ata a gran árbore situada no cumio do Bosque de Galicia.
O Proxecto Nós potencia a presenza do galego no eido dixital
A Xunta de Galicia presenta en Culturgal da man do secretario xeral de Política Lingüística, Valentín García, unha importante iniciativa encamiñada a conseguir que a lingua galega estea presente no eido dixital a través de asistentes de voz, subtitulación automática de contidos audiovisuais, apoio ao diagnóstico médico, servizos de teleasistencia avanzada ou na tramitación administrativa a través de asistentes virtuais.
Proxecto Nós de Intelixencia Artificial ao servizo da lingua galega é unha ambiciosa aposta da Consellería de Cultura, Educación e Universidade, en colaboración coa Universidade de Santiago, que conta coa participación da Axencia de Modernización Tecnolóxica de Galicia (Amtega) e o Centro Singular de Investigación en Tecnoloxías Intelixentes (CiTIUS). O proxecto, que se centra en dúas grandes áreas de traballo, o procesamento de voz e de texto, supón colocar a Galicia na vangarda da Intelixencia Artificial e Tecnoloxías da Linguaxe.
Rapa, a nova serie de Portocabo que se está a rodar en Galicia
O audiovisual centra a última das actividades do programa da Xunta en Culturgal coa presentación de Rapa, a nova serie que Portocabo está a rodar en Galicia para Movistar + e primeiro proxecto que se beneficia do fondo para a atracción de rodaxes do novo Hub Audiovisual da Industria Cultural, a través do que recibe unha subvención de 300.000 euros.
Jacobo Sutil, director da Axencia Galega das Industrias Culturais (Agadic); Alfonso Blanco Fosco, CEO de Portocabo e produtor executivo da serie, e Pepe Coira, co-creador e guionista, participan neste relatorio no Espazo Foro, conducido pola xornalista Marta Gómez. Trátase dun thriller ambientado na serra da Capelada beneficiario da primeira convocatoria do Hub Audiovisual, un dos grandes proxectos do Goberno galego no eido cultural e para o que se contará cun investimento récord de 9,6M no período 2021-2023 a través do Fondo Europeo de Desenvolvemento Rexional (FEDER) dentro do Eixo REACT-UE.
Portocabo está tamén presente no Espazo Cinema da feira, onde se proxecta Cuñados, primeira longametraxe cinematográfica desta produtora galega, para a que contou tamén cunha subvención da Xunta de preto de 260.000 euros.
EuroPCom, a Conferencia Europea de Comunicación Pública, é a maior reunión anual de expertos en comunicación pública de Europa organizada polo Comité Europeo das Rexións en colaboración coa Comisión Europea, o Parlamento Europeo, o Consello, o Banco Europeo de Investimentos, o Comité Económico e Social Europeo e a Organización para a Cooperación e o Desenvolvemento Económicos. O evento ofrece unha plataforma para explorar as últimas tendencias, iniciativas e ideas no ámbito da comunicación pública. O director xeral de Relacións Exteriores e coa Unión Europea, Jesús Gamallo, participou nesta Conferencia organizada polo Comité Europeo das Rexións, e celebrada baixo o lema 'Máis alá das palabras. Unha historia de confianza'.
O Diario Oficial de Galicia publica hoxe a declaración de Ben de Interese Cultural da Rapa das Bestas de Sabucedo por considerar acreditado o seu valor sobranceiro como patrimonio inmaterial do pobo galego, ao tratarse dunha das festas máis antigas de Galicia que conta, como mínimo, con tres séculos de historia. Este recoñecemento supón a aplicación de inmediato do réxime de tutela da Lei de Patrimonio Cultural e, polo tanto, o maior nivel de protección. Esta distinción, que se suma á de Festa de Interese Turístico Internacional acadada en 2007, chega tras o visto e prace a este decreto por parte do Consello da Xunta este pasado luns, 30 de xullo, e logo de completarse o expediente administrativo, no que constan os dous informes preceptivos dos órganos consultivos favorables.
