Noticias

A Cidade da Cultura inaugura a primeira exposición retrospectiva adicada á escultura de Jorge Castillo

Inaugurouse no Museo Centro Gaiás da Cidade da Cultura 'Castillo, escultor', a primeira exposición retrospectiva realizada ata o momento que se centra na escultura de Jorge Castillo, unha faceta artística que se ben é máis descoñecida, comparte a grandeza da súa obra pictórica. Esta escolma de 120 obras percorre as seis décadas de traxectoria dun dos artistas galegos vivos de maior prestixio e relevancia internacional, cuxa obra forma parte de importantes coleccións de arte de todo o mundo, como o Carnegie Institute de Pittsburgh, o San Francisco Museum of Modern Art, o Guggenheim Museum de Nova York ou a Nationalgalerie de Berlín.

O conselleiro de Cultura, Educación e Universidade, Román Rodríguez, inaugurou hoxe no Museo Centro Gaiás da Cidade da Cultura Castillo, escultor, a primeira exposición retrospectiva realizada ata o momento que se centra na escultura de Jorge Castillo, unha faceta artística que se ben é máis descoñecida, comparte a grandeza da súa obra pictórica, nun diálogo constante entre ambas disciplinas.

Esta escolma de 120 obras percorre as seis décadas de traxectoria dun dos artistas galegos vivos de maior prestixio e relevancia internacional, cuxa obra forma parte de importantes coleccións de arte de todo o mundo, como o Carnegie Institute de Pittsburgh, o San Francisco Museum of Modern Art, o Guggenheim Museum de Nova York ou a Nationalgalerie de Berlín.

Na inauguración, o representante da Xunta de Galicia salientou a “oportunidade única que supón esta mostra de achegarse á escultura de Jorge Castillo, imprescindible para comprender como un todo a extensa traxectoria e singular universo creativo do artista pontevedrés”. Román Rodríguez destacou a súa figura como “un dos grandes nomes das artes plásticas do último século, de incuestionable prestixio e relevancia internacional, que viviu e traballou por todo o mundo e con obra exposta nalgunhas das mellores galerías de arte”.

O titular de Cultura do Goberno galego quixo ademais agradecer especialmente ao artista “a súa xenerosidade e implicación neste proxecto expositivo, e a súa presenza hoxe aquí para presentarnos esta escolma de máis dun centenar de obras, reunidas de xeito inédito”. A exposición, que abrangue as diferentes etapas artísticas de Jorge Castillo, inclúe recentes obras de grande formato, pezas en bronce e aceiro, arxilas datadas nos últimos cinco anos, así como unha pequena selección de lenzos, augafortes ou cadernos de viaxe.

Oportunidade inédita

A mostra está comisariada por Pilar Corredoira, historiadora da Arte Contemporánea, comisaria de exposicións, investigadora no eido da arte galego dos séculos XX e XXI e unha das maiores coñecedoras da traxectoria de Castillo. Na súa intervención quixo tamén destacar a singularidade deste proxecto que “por vez primeira reúne e afonda no traballo escultórico dun artista poliédrico en quen, desde os comezos da súa traxectoria, a escultura marca notablemente o devir da súa obra, permitindo renovados conceptos e determinando unha identidade e linguaxe propias”.

Corredoira quixo pór tamén en valor a excepcionalidade de poder ver “a obra de Castillo nun espazo tan singular como o Museo Centro Gaiás, no que a montaxe expositiva, as pezas exhibidas e a propia arquitectura establecen un diálogo único de liñas e formas convertendo a exposición nunha experiencia irrepetible”.

Posta en valor de artistas galegos

Castillo, escultor continúa, ademais, a senda doutras exposicións monográficas desenvolvidas polo Museo Gaiás nos últimos anos, dedicadas á traxectoria de grandes figuras das artes, as letras ou a cultura galega, entre as que se atopan Antón Lamazares. Flor Novoneyra; José Suárez, uns ollos vivos que pensan; Baldomero Pestana: a verdade entre as mans; ou Camilo José Cela 1916-2016. O centenario dun Nobel.

A través de proxectos expositivos coma estes, segundo resaltou o conselleiro de Cultura, “a Xunta continúa a traballar na recuperación do legado de galegos que construíron en Galicia e tamén na diáspora unha obra memorable, grandes nomes das nosas artes que nos lembran tamén que dalgún xeito, Galicia esténdese alén do Atlántico”.

A exposición, que abrirá as súas portas ao público mañá xoves, poderá visitarse no segundo andar do Museo Centro Gaiás ata o vindeiro 20 de febreiro de 2022. Conta con entrada de balde, de martes a domingo e de 10,00 a 20,00 horas.

Biografía de Jorge Castillo Casalderrey

Nace en Pontevedra en 1933, mais pasa a súa infancia e xuventude na Arxentina. De formación autodidacta, asiste en 1949 ao taller dos artistas arxentinos Raquel Forner e Alfredo Bigatti e realiza nestes anos as súas primeiras obras, pinturas e debuxos. Nos anos 50 compaxina o traballo de deseñador na industria metalúrxica coa súa faceta artística e axiña entra en contacto coa intelectualidade galega en Bos Aires e con autores como Laxeiro, Colmeiro ou Seoane. A medianos desa década iniciou un periplo europeo que o levaría a residir ou expor en cidades como Madrid, Zaragoza, Barcelona, París, Xenebra ou Berlín, e estendeu o seu traballo aos campos da escultura e o gravado. Tamén conecta con importantes personalidades da arte como Juana Mordó ou Marienza Binetti.

A selección da súa obra para a Bienal de São Paulo en 1960 abre unha década na que consolida a súa proxección internacional e en 1980 instálase en Nova York, facéndose un oco na escena estadounidense da arte contemporánea: a Galería Marlborough de Manhattan comeza a representalo e o Guggenheim Museum adquire parte da súa obra.

A día de hoxe, tras seis décadas en activo, a súa obra forma parte de importantes coleccións de arte de diferentes lugares do mundo, como o Carnegie Institute, o San Francisco Museum of Modern Art, o Albertina Museum, a Fundación Juan March, o Museo de Belas Artes de Vitoria ou a Nationalgalerie de Berlín.

R., 2021-10-21

Actualidad

Foto del resto de noticias (nova-galega-de-danza.jpg) O calendario de estreas do programa de coproducións de danza que desenvolve o Centro Coreográfico Galego entra na súa recta final con tres citas esta semana. O venres terán lugar as primeiras funcións de Nova Galega de Danza co espectáculo Credo nas Pontes de García Rodríguez e de Colectivo Glovo con Tabú en Lugo, mentres que Javier Martín exhibirá este sábado en Oleiros Figuras do limiar, na que será a súa presentación en Galicia tras ver a luz o pasado 12 de novembro no Teatro El Musical de Valencia. Ademais, o 22 de decembro subirá a escena na Coruña a peza Nó, da compañía Elahood, coa que se completarán as estreas das seis pezas coproducidas polo Centro Coreográfico Galego a través das convocatorias de 2020 e 2021.
Foto de la tercera plana (coronavirus.jpg) A Dirección Xeral de Saúde Pública da Consellería de Sanidade informa que, na última actualización, o número de casos activos de coronavirus en Galicia é de 6.495 deles 911 son da área da Coruña, 573 da de Lugo, 1.709 da de Ourense, 667 da de Pontevedra, 1.841 da área de Vigo, 488 da de Santiago e 306 da de Ferrol. Do total de pacientes positivos, 32 están en UCI, 155 en unidades de hospitalización e 6.308 no domicilio. Polo de agora, en Galicia hai un total de 182.286 persoas curadas, rexistrándose 2.673 falecementos. O número de PCR realizadas é de 3.013.065. O número de doses de vacina contra a covid-19 administradas é de 4.993.864.

Notas

A directora da Axencia Galega de Innovación (Gain), Patricia Argerey, destacou en Lugo que a Business Factory Aero (BFAero) é unha peza fundamental no marco da nova estratexia do Polo Aeroespacial de Galicia 2021-2025 para seguir sumando talento e consolidando tecido empresarial. De feito, os 19 proxectos que pasaron ata o de agora por esta incubadora e aceleradora especializada no sector aeroespacial mobilizaron arredor de 5 millóns de euros, supuxeron 62 postos de traballo e a construción de oito novas empresas.
O que hoxe coñecemos como mar Mediterráneo era, hai entre 230 a 66 millóns de anos, durante a era dos dinosauros, un complexo arquipélago tropical composto por centos de illas. A comunidade científica consideraba que a maioría desas illas eran tan pequenas que sería complicado que puidesen albergar poboacións de grandes saurios.
PUBLICIDAD
ACTUALIDAD GALICIADIGITAL
Blog de GaliciaDigital
PROMOCIÓN
PUBLICACIONES
Publicaciones
Publicaciones Amencer
Revista Egap
Obradoiro de Artesania