miércoles, 9 de julio de 2025
O secretario xeral de Cultura, Anxo M. Lorenzo, participou na presentación do festival MindoMúsica que se celebrará do 28 de xuño ao 4 de xullo en distintos emprazamentos de Mondoñedo. Na programación inclúese desde a Catedral ata varias parroquias, con concertos en pequeno e medio formato que incluirán encontros de músicos coa veciñanza nos locais sociais coa intención de achegar a música clásica a todos os públicos.
Como expresou o representante da Consellería de Cultura, Educación e Universidade, trátase dunha iniciativa que demostra a importancia de facer extensiva a cultura en todas as súas vertentes a todos os públicos, na liña na que a Xunta está a traballar. Neste sentido, recordou que este ano se realiza unha importante aposta por promover e divulgar de xeito especial este xénero musical a través de apoios a diferentes entidades de música clásica galega para promover concertos, xiras e incentivar a composición deste xénero musical.
Felicitou, ademais, aos impulsores do Festival Mindomúsica por poñer en marcha esta iniciativa que encherá de oferta cultural o verán galego, que se sumará ás máis de 3.000 actividades que a Xunta de Galicia impulsa durante estes meses para continuar reactivando o sector cultural. O Festival incluirá concertos na Catedral, no Auditorio Municipal Pascual Veiga e no Centro Cultural da Alcántara de Mondoñedo e percorrerá tamén as parroquias do concello con concertos en pequeno formato. Ademais, están previstos encontros dos músicos coa veciñanza nos locais sociais a cargo dunha pequena formación. A intención é conectar a música coa xente do rural, achegando a cultura a todos os públicos coa idea de involucralos e crear novos amantes deste xénero musical.
MindoMúsica aposta tamén pola revalorización dos músicos mindonienses e pola promoción da riqueza histórico-cultural. Por iso, completarase coa organización dunhas xornadas en torno á figura de Pacheco e a súa obra coa participación de importantes musicólogos da Universidade de Santiago, a Universidade Complutense de Madrid, a Universidad de La Rioja, entre outras. Haberá tamén xornadas gastronómicas e enolóxicas coa colaboración dos hosteleiros de Mondoñedo para a promoción de produtos locais.
O Festival Abanea celebrará entre o 16 e o 20 de xullo a súa cuarta edición cun programa de danza contemporánea de distintos estilos que distribuirá 15 funcións de nove compañías entre os concellos de Ames, Outes, Marín, Foz e Celanova. ISMO Cultura, colectivo organizador do encontro, estenderá así a súa actividade de exhibición e dinamización ás catro provincias. A bailarina Andrea Castro presentou a primeira fase do espectáculo Lola y los lamentos, como artista seleccionada para o acompañamento bienal 20252026 co que o festival apoia procesos de creación de artistas emerxentes e que nesta edición terá como resultado a estrea de 'A mona de seda'.
As diversas actividades do festival terán lugar do 28 de xullo ao 1 de agosto no claustro do Mosteiro de San Salvador de Celanova. A actuación que inaugurará a cita será a da Banda de Música de Celanova con James Morrison, un concerto único en España que terá lugar ás 20,30 horas. Ademais deste, subirán ao escenario a Boston Brass de Estados Unidos, Abraham Cupeiro coa Orquestra Gaos e pechará a edición o Hércules Brass Ensemble dirixido por Isabel Rubio e coa Boston Brass e Adam rapa como solistas. Así, os concertos complementaranse con cinco días de actividades formativas para un centenar de estudantes procedentes de distintas comunidades autónomas. Clases de alto nivel da man dalgúns dos participantes nas actuacións e un seguimento continuo e individualizado que garante un acompañamento pedagóxico para o alumnado que xa leva participado en varias edicións consecutivas do festival.
