domingo, 25 de octubre de 2026
A conselleira do Mar, Rosa Quintana, trasladou hoxe ao ministro do Mar de Portugal -que ostenta a Presidencia rotatoria do Consello da Unión Europea-, Ricardo Serrão, a necesidade de que as autoridades europeas flexibilicen as medidas recollidas no futuro regulamento europeo de control da pesca así como a urxencia de acadar un acordo de totais admisibles de capturas (TAC) e cotas nas augas compartidas co Reino Unido co obxectivo de dar estabilidade e seguridade xurídica á frota.
A titular de Mar, que mantivo un encontro por videoconferencia co mandatario luso que preside o Consello de Ministros de Pesca da UE, defendeu o labor responsable que desenvolven a frota de baixura e o marisqueo galegos e lamentou a excesiva rigorosidade do texto da nova normativa de control, pois incide nunha actividade que está ben controlada ao desenvolverse preto da costa. Neste sentido, apelou á sensibilidade do representante do Goberno de Portugal, un país cun importante sector pesqueiro e con características semellantes ás do galego.
A representante do Executivo galego, que estivo acompañada pola secretaria xeral técnica da Consellería, Silvia Cortiñas, advertiu de que medidas introducidas no regulamento -como a instalación de cámaras a bordo, a xeolocalización ou o rexistro dixital das declaracións de desembarque- apenas supoñen melloras para o control da actividade e dificultan en gran medida a actividade dos profesionais do mar. Ademais, estas medidas supoñen cargas adicionais tanto para o sector como para os estados membros que, en moitos casos, poden ter dificultades para asumir.
Galicia defende que as novas ferramentas de control teñan en conta as características do sector e sexan acordes á súa realidade co obxectivo de que non xeren malestar e sexan entendidas polos profesionais da pesca e do marisqueo. Por iso, pide que se mellore o texto durante o proceso de negociación dos trílogos -os debates entre a Comisión Europea, a Eurocámara e o Consello Europeo- para contar cunha normativa adaptada á realidade da frota e que non castigue ao sector.
Brexit
Rosa Quintana e Ricardo Serrão abordaron tamén a situación derivada do brexit e a negociación das posibilidades de captura en augas compartidas co Reino Unido, un asunto no que Galicia considera necesario pechar un acordo o antes posible para dar seguridade xurídica e estabilidade á frota. A comunidade galega tamén ve fundamental ter en conta os aspectos sociais e económicos na fixación dos TAC e cotas, tal e como recolle a Política Pesqueira Común (PPC).
Neste sentido, a conselleira do Mar trasladou ao mandatario portugués o mal precedente que suporía vencellar o acordo co Reino Unido exclusivamente ás recomendacións científicas e apostou por avanzar nas negociacións de cara a 2026 blindando o mantemento do statu quo, acadando o acceso ás augas británicas a cambio da entrada do produtos do Reino Unido no mercado europeo.
A xuntanza tamén serviu para analizar o fondo de reserva de axuste do brexit, sobre o que Galicia defende a inclusión de compensacións para os efectos indirectos na pesca do divorcio entre a UE e o Reino Unido. A comunidade pide que se incorporen aspectos como o impacto en augas de terceiros países ou internacionais así como a menor rendibilidade derivada das dificultades para xerar intercambios.
Esta situación ten como orixe a cesión do 25% das cotas europeas ao Reino Unido ata 2026 a cambio do acceso a augas británicas durante só cinco anos e medio no marco do acordo sobre o brexit. A maiores, o Executivo galego defende que se amplíen os recursos do fondo destinado ao sector pesqueiros desde os 600 ata os 1.000 millóns de euros e que se poidan empregar os fondos non utilizados do actual Fondo Europeo Marítimo e de Pesca (FEMP) así como que a súa vixencia chegue, como mínimo, ata 2026.
Por último, a conselleira do Mar trasladoulle ao ministro do Mar luso a importancia de que na estratexia da Unión Europea sobre diversidade para 2030 recoñeza o papel do sector pesqueiro como elemento de sustentabilidade e conservación dos mares así como a transcendencia dos aspectos sociais e económicos da pesca e o seu papel na posta a disposición da cidadanía de alimentos de calidade.
Foi inaugurada no Museo do Pobo Galego a exposición 'Transfronteiriza', da artista e cineasta tudense Diana Gonçalves, que permanecerá aberta ao público ata o 28 de marzo de 2027. A mostra parte do documental 'Mulleres da Raia', da mesma autora, e froito de tres anos de investigación. A través da linguaxe cinematográfica, de materiais documentais, arquivos históricos e elementos patrimoniais, a proposta constrúe unha experiencia arredor da memoria compartida entre Galicia e o norte de Portugal. En concreto, Transfronteiriza recupera a memoria das mulleres que viviron na fronteira entre ambos territorios a mediados do século XX, que desempeñaron un papel fundamental no comercio transfronteirizo e na supervivencia económica das familias.
Trátase dunha iniciativa que nace como evolución de Circo Presente Continuo e que se vai desenvolver por primeira vez fóra de Madrid. A Cidade da Cultura, o Teatro Principal e o Salón Teatro serán as súas sedes na capital galega, reunindo artistas, compañías, profesionais da programación, distribuidoras e institucións para compartir proxectos e favorecer novas oportunidades de colaboración e contratación. O programa inclúe oito espectáculos, seis mostras breves e catro traballos en proceso. Entre as propostas figuran Naufragio, de Labsurda; Serena, de Circ Bover; Matrimonio, de Kolektivo Konika; Siku, de Jessica Arpin; e Sen patrón, de Pistacatro, que ofreceu un adianto artístico durante a presentación.
