viernes, 27 de junio de 2025
O secretario xeral de Cultura, Anxo M. Lorenzo, participou hoxe na Cidade da Cultura na presentación de O Camiño Creativo. Xacobeo Emprende! De Madrid a Santiago. Un Camiño para Emprendedores Creativos, iniciativa que impulsará unha vintena de proxectos de mentorización para desenvolver ideas de negocio no eido do sector cultural. Trátase dunha iniciativa organizada desde a Rede de Cidades e Territorios Creativos de España que se celebrará este verán e que está dirixida a profesionais do sector como artistas, poetas, músicos ou investigadores.
O representante da Xunta de Galicia salientou a importancia de fomentar o emprendemento no sector cultural, con especial atención nos novos talentos. Esta iniciativa é unha oportunidade para apoiar aos novos creadores co fin de que poidan desenvolver os seus proxectos e ideas, explicou Anxo M. Lorenzo. Neste sentido, trasladou que é fundamental que os territorios sexan capaces de xerar valor vinculando os seus recursos á actividade cultural e facilitando que se poñan en marcha iniciativas innovadoras e creativas.
Camiño Creativo celebra este ano a súa primeira edición co obxectivo de promover novos modelos de negocio e xerar riqueza e emprego no sector da creatividade ao tempo que se reactivan os sectores económicos tradicionais. Así mesmo, a iniciativa, que conta co apoio da Xunta de Galicia, tamén procura favorecer a cohesión social a través do diálogo intercultural, preparar á mocidade para asumir o liderazgo na economía creativa, promover a difusión de coñecemento, a creatividade e espírito emprendedor e impulsar unha educación cultural aberta á sociedade.
Os interesados en participar nesta primeira edición poderán inscribirse na convocatoria que se publicará no espazo web da iniciativa. Os seleccionados percorrerán durante o mes de xullo o Camiño de Inverno desde Ponferrada en 10 etapas nas que poderán desenvolver a súa idea de negocio coa axuda de titores a través de oito talleres formativos que serán gratuítos para todos os asistentes.
Nun momento de auxe das intelixencias artificiais xerativas, 'Castelao. Mirar por Galicia' aposta polo emprego destas tecnoloxías para achegar a nosa historia e a nosa cultura a todo tipo de públicos, aproveitando todo o potencial das novas linguaxes, pero tamén facéndoo dun xeito ético e responsable, sen deixar de lado o necesario traballo de autor. O estudio compostelán Maxina é responsable do deseño conceptual, animación e deseño desta experiencia, baixo a dirección artística de Carlos Seijo, mais son numerosas as empresas galegas que forman parte deste proxecto, entre as que se atopa o Laboratorio Numax, ao cargo do deseño gráfico en sala; a produtora audiovisual Miramemira, responsable dos audiovisuais; MADA producións, que se ocupou da accesibilidade; Daexga, que se encargou do transporte e montaxe, e Vifer, de cuxa autoría é a instalación de gráfica.
Música, territorio e natureza son os eixos fundamentais do Fisterra Experience, unha singular cita musical que regresa esta fin de semana á vila mariñeira de Fisterra co apoio dos Concertos do Xacobeo para celebrar a súa segunda edición os días 27, 28 e 29 de xuño. Fisterra Experience busca achegarse á arte dun modo cercano, ofrecendo experiencias únicas e inspiradoras. O festival explora as posibilidades que ofrecen o territorio e a natureza de Fisterra, desde unha ollada sostible e comunitaria. Entre as bandas e artistas destacados do seu cartel, danse cita nomes como Baiuca, Mondra, Helena Egea, Sabela & The Heartbreakers, A Pedreira e Andhrea & The Blacks Cats, entre moitos outros. Deste modo, o Fisterra Experience renace neste 2025 para ofrecer unha experiencia musical cualitativa que vai da electrónica ao soul, do pop ao jazz e a nova música tradicional, entre outros sons, nunha contorna única.
