martes, 27 de octubre de 2026
A directora de Turismo de Galicia, Nava Castro, participou hoxe na presentación da mostra Arquitectura da auga. Territorio, imaxe e pensamento, na que se recollen as conclusión dun traballo de investigación e de fotografía no que se analizou a arquitectura da auga presente no Camiño de Santiago en cinco pequenos núcleos situados na contorna da capital galega.
A mostra, que permanecerá na Fundación DIDAC de Santiago ata finais do mes de abril, descobre o potencial cultural e o peso de elementos arquitectónicos modestos (fontes, lavadoiros...) que dan sentido ao territorio a través do estudo de cinco enclaves: O Amenal (Francés); Rubial (Vía da Prata), Rúa de Francos (Portugués); Augapesada (Fisterra) e Marantes (Inglés). O traballo estivo impulsado pola arquitecta Elisa Gallego e o fotógrafo Julián Barón, en colaboración coa Escola Técnica Superior de Arquitectura (ETSAC) e o Grupo Cidade e Territorio, ambos da Universidade da Coruña.
O proxecto conta cunha axuda de 14.462,81 euros por parte da Xunta de Galicia ao abeiro do programa O Teu Xacobeo, co que se busca impulsar un Xacobeo espallado e integrador, que permita desenvolver unha ampla diversidade de iniciativas que integren á sociedade galega no fenómeno xacobeo.
Nesta edición de O Teu Xacobeo desenvolveranse un total de 220 propostas orientadas a dinamizar a programación sociocultural do Xacobeo. Conta cun investimento de case 3,3 millóns de euros que suporán unha mobilización de recursos de máis de 5,8 millóns.
O proxecto Xenoma Galicia, que conta cun investimento de 20 millóns de euros, ten por obxecto recompilar o ADN de 400.000 galegos para identificar os xenes relacionados co cancro de mama e ovario hereditario, a síndrome de Lynch e a hipercolesterolemia familiar. Ata o de agora, foron analizadas 3.112 mostras biolóxicas. En concreto, 1.037 mostras de sangue na primeira pilotaxe do proxecto, 796 de saliva no segundo piloto e, coa primeira fase do proxecto en marcha, 1.279 mostras dos voluntarios dos primeiros distritos participantes. A análise das mostras destes 1.279 participantes da fase 1 permitiu detectar 25 novos casos positivos. En concreto, 14 participantes deron positivo en cancro de mama e ovario hereditario, dous na síndrome de Lynch e nove en hipercolesterolemia familiar.
A Pedreira e Fillas de Cassandra estarán presentes no Womex 2026, o máis importante encontro mundial das músicas folk e de raíz que se celebra ata este domingo en Las Palmas de Gran Canaria. Trátase dunha iniciativa que ofrece aos artistas e ás empresas galegas un espazo para dar a coñecer o seu traballo ante programadores, festivais, axencias de contratación e outros profesionais de diferentes países. A artista foi escollida por un xurado internacional independente para formar parte dos Official Showcases, a selección oficial de concertos coa que Womex achega aos profesionais propostas das músicas do mundo.
