domingo, 8 de noviembre de 2026
A directora da Axencia Galega de Innovación (Gain), Patricia Argerey, asistiu hoxe no Centro Experimental Áncora de Cervo á xornada de peche do proxecto Xestal (Xestión forestal sostible mediante teledetección remota), apoiado pola Xunta a través do programa Conecta Peme.
A directora de Gain destacou o aliñamento deste proxecto, que persegue optimizar a xestión do monte, coas políticas de innovación da Xunta, así como coas prioridades europeas de transición dixital e ecolóxica. Precisamente, a Estratexia de Especialización Intelixente de Galicia (RIS3) inclúe como un dos tres retos prioritarios a modernización dos sectores primarios galegos, como é o caso dos recursos forestais, a través, entre outras medidas, da incorporación das novas tecnoloxías para xerar produtos e servizos innovadores.
O proxecto Xestal contribúe a optimizar procesos clave na xestión dos recursos forestais, como o inventario forestal, a planificación, seguimento e control de masas forestais, a través dunha solución tecnolóxica baseada na automatización de toma de datos a través de novas tecnoloxías embarcadas en vehículos non tripulados. Esta solución tecnolóxica, dirixida fundamentalmente a enxeñarías medioambientais e xestores forestais, permitirá reducir custos respectos dos métodos de medición actuais, dispor de información actualizada e de valor engadido para mellorar a tomar de decisións, o control e a execución das actuacións dos plans de ordenación forestal.
Este proxecto está apoiado polo programa Conecta Peme da Axencia Galega de Innovación con preto de 560 mil euros, cofinanciados a través do Programa Operativo Feder Galicia 2014-2020. O programa Conecta Peme ten como obxectivo fomentar a cooperación entre as pemes e os demais axentes do Sistema galego de innovación a través do apoio a proxectos de I+D+i orientados ao mercado e aliñados cos retos e prioridades identificados na RIS3 para Galicia. En total, a través das catro convocatorias deste programa mobilizáronse 150 millóns de euros en 187 proxectos de cooperación nos que participaron 433 empresas -o 95% pemes- e se xeraron 530 empregos.
Argerey destacou o enorme potencial que ofrece o segmento dos vehículos non tripulados ou drons, polo que a Xunta vén apostando desde 2015 a través do Polo Aeroespacial de Galicia no que se levan investido máis de 164 millóns de euros de fondos públicos e privados. Entre os 59 proxectos de I+D desenvoltos nesta iniciativa atópanse tecnoloxías para mellorar a prestación de determinados servizos públicos vencellados ao monte, como a protección contra incendios forestais ou o control de pragas. Agora, esta nova ferramenta vén complementar as desenvoltas con anterioridade, achegando tecnoloxía dirixida á xestión privada do monte.
A directora de Gain destacou como un dos resultados máis relevantes da primeira fase do Polo Aeroespacial de Galicia a configuración dun ecosistema innovador en Galicia arredor do segmento dos vehículos non tripulados ou drons, que ten demostrado grandes capacidades, e puxo como exemplo desta capacidade e do valor da colaboración o consorcio que desenvolveu este proxecto. Nel participaron as empresas galegas Aeromedia, Cerna, Balidea e Greenalia, así como o Instituto Tecnológico de Galicia (ITG) e a Unidade de Xestión Forestal Sostible da Universidade de Santiago de Compostela.
Así mesmo, Argerey subliñou a importancia da dixitalización na modernización do tecido produtivo galego, especialmente das pemes, e na recuperación económica. Nesta liña, lembrou que segue aberta ata o 22 de abril a convocatoria Conecta Hubs da Axencia Galega de Innovación, que ten como obxectivo apoiar proxectos de I+D+i colaborativos aliñados coas áreas dos Hubs Galegos de Innovación Dixital estratéxicos co obxectivo de avanzar tanto na transición dixital das pemes galegas, como na especialización do tecido produtivo galego, mellorando deste xeito a súa competitividade.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
