Galicia viviu o inverno máis húmido das últimas dúas décadas
O inverno climatolóxico galego, comprendido entre os meses de decembro de 2020 e febreiro deste ano, caracterizouse por rexistrar temperaturas dentro dos valores agardados e precipitacións un 76% superiores ao habitual se se comparan co período de referencia 1981-2010. Neste sentido, os datos de precipitación rexistrados nas estacións máis representativas da comunidade fan que a estación se considere moi húmida, tendo que remontarse ao ano 2001 para atopar un precedente máis chuvioso. Segundo o avance do informe climatolóxico do inverno elaborado por MeteoGalicia, os tres meses do período analizado caracterizáronse por rexistrar precipitacións bastante elevadas.
Destaca especialmente febreiro, un mes marcado pola influencia de varias borrascas moi activas e as súas frontes asociadas que explican que chovera un 139% máis do habitual, anomalía similar á dos anos 2014 e 2016.
Tamén decembro foi un mes moi húmido, cun 67% máis de chuvias do esperado, mentres que xaneiro saldouse cun 37% máis de chuvia do previsible nesta época, polo que o período caracterizouse como húmido.
O comportamento destes tres meses explican que, no seu conxunto, o inverno climatolóxico se considere con carácter xeral en toda Galicia como moi húmido, cun valor medio das precipitacións de 853 litros por metro cadrado.
En todo caso, os valores máis altos concentráronse en gran parte do oeste da Comunidade, pero tamén en zonas montañosas das provincias de Lugo e Ourense, onde se chegaron a superar os 2.500 l/m2. No extremo contrario situouse a comarca de Valdeorras, onde nin sequera se alcanzaron os 250 l/m2 neste mesmo período.
Comportamento das temperaturas
Polo que respecta ás temperaturas, o inverno climatolóxico que acaba de rematar mantívose en Galicia dentro de valores normais para esta época do ano. Deste xeito, a temperatura media no período decembro-xaneiro-febreiro situouse en 8,8 graos, un dato dentro da normalidade se se compara coa serie histórica representativa.
En canto ao comportamento das temperaturas por zonas xeográficas, os valores máis extremos localizáronse no Macizo central ourensán e en Pena Trevinca, con datos próximos aos -0,8 graos; e no litoral da Comunidade, onde precisamente pola proximidade do mar acadáronse temperaturas medias de case 12 graos.
Tendo en conta os valores medios do período que se toma como referencia (1981-2010), o comportamento das temperaturas este inverno moveuse en cifras moi próximas ás habituais. Isto debeuse a que as máximas foron lixeiramente frías, situándose en 0,41 graos por debaixo do normal, mentres que as mínimas foron moi cálidas, acadando valores 1,06 graos por riba da media histórica e que permitiron compensar o dato anterior.
Deste xeito, a anomalía da temperatura media para o conxunto da Comunidade foi de apenas 0,32 graos, un dato que contrasta co comportamento do inverno precedente, moito máis cálido e durante o cal os valores medios superaron en 1,31 graos o dato do período de referencia.
R., 2021-03-08
Actualidad
O equipo, eminentemente galego e cunha moi alta porcentaxe feminina, está a filmar en distintas localizacións das provincias da Coruña e Lugo, a través das que se reconstrúe o nacemento e a evolución da mítica fábrica de cerámica, que se deu en chamar a Bauhaus galega polas cores, formas e deseños vangardistas das súas creacións. Ao tempo, contarase tamén a historia de Galicia a través do seu deseño, cos seus elementos diferenciais e de calidade no centro do discurso. Outros dos escenarios polos que discorrerá Hoxe e o resto do mundo son Cervo (Lugo), onde comeza esta historia a primeiros do século XIX, Sada (A Coruña) e Santiago de Compostela, ademais doutros espazos da cidade herculina.
O CDG celebra os 40 anos da súa fundación desenvolvendo unha intensa programación que estende a súa actividade á produción e participación en 15 espectáculos e proxectos escénicos, a máis de 100 concellos de toda a Comunidade e á colaboración con entidades dunha decena de países en Europa e América. En palabras de Román Rodríguez, conselleiro de Cultura, a unidade teatral continuará avanzando nunhas liñas mestras que, desde o respecto ao pasado, poñen o foco en novas vías de encontro coa cidadanía, na accesibilidade, na proxección exterior ou na creación galega.
Notas
A Facultade de Química será entre os días 3 e 6 de setembro a sede do XI Congreso Internacional de Nanociencia e Nanotecnoloxía Analítica (XI NyNA 2024). O encontro está organizado polo grupo de investigación de Elementos Traza, Espectroscopía e Especiación (GETEE) e o Instituto de Materiais (iMATUS) da USC coa colaboración do Grupo Especializado en Ciencia e Tecnoloxías (Bio) Analíticas da Real Sociedade Española de Química (RSEQ).
Os vindeiros 9, 10 e 11 de abril celébrase na Universidade da Coruña o primeiro congreso IA & Hospitality, un espazo onde se analizará a relación presente e futura entre a Intelixencia Artificial e o turismo, un dos principais motores económicos do noso país. O programa do congreso, que terá lugar no Paraninfo da UDC, inclúe oito mesas de debate nas que se tratará dende a experiencia do cliente ata a ciberseguridade e os destinos e a IA.