miércoles, 8 de abril de 2026
Neste sentido, o concello pontevedrés de Soutomaior será o único municipio de Galicia que permanecerá no nivel máximo de restricións. Ademais, os concellos de Cariño, Guitiriz, Lourenzá, Pobra de Brollón, Tordoia, Porto do Son, Mos, Mondariz, Pazos de Borbén e Boborás ficarán no nivel alto. Os restantes concellos galegos situaranse no nivel medio.
Tras realizar un repaso do nivel asistencial dos centros sanitarios galegos, o xerente do Sergas, José Flores, remarcou que neste momento a presión asistencial é un condicionante que está a incidir na posibilidade de aminorar as restricións, nomeadamente, nas áreas de Coruña e Pontevedra. Asimesmo, Flores destacou o importante descenso que se rexistrou na ocupación media dos hospitais galegos por mor da covid-19, situándose nestes intres no 5% no caso das unidades de hospitalización e, no 13% no caso das UCI.
Pola súa banda, a directora xeral de Saúde Pública, Carmen Durán, salientou a mellora substancial dos datos epidemiolóxicos de Galicia no seu conxunto, respecto das cifras de hai dúas semanas. Así, destacou que dos 313 concellos galegos, 91 deles non contaron con ningún novo caso por coronavirus nos últimos 14 días; e que nas últimas 7 xornadas, en 165 municipios tampouco se rexistraron novos positivos.
Durante a súa intervención, Durán tamén puxo o foco en que Galicia posúe arestora un nivel de reprodutividade instantáneo do 0.8% e que, a taxa de positividade por PCR se sitúa no 37%, moi por debaixo do 649% da media española.
No que atinxe ás novas variables da covid-19, a responsable de Saúde Publica salientou que a comunidade galega conta neste intres con 90 casos secuenciados da denominada cepa británica, 1 caso da cepa surafricana e, 1 caso da cepa brasileira, este último aínda en estudo.
No peche da rolda prensa, o conselleiro de Sanidade agradeceu de novo o excelente traballo realizado por todos os profesionais do ámbito sanitario cuxo esforzo e dedicación, permite comezar a aliviar as restricións, cando estamos a piques de cumprir xa un ano de pandemia. Así mesmo, valorou o importante labor do membros do Comité Clínico e o comportamento prudente e con sentidiño que amosa a meirande parte da cidadanía galega.
O Carballo Interplay desenvolverá do 16 ao 19 de abril no Mercado de Carballo a súa 13ª edición cun programa de 32 actividades arredor da creación dixital contemporánea, das series en pequeno formato, a cultura de internet e a reflexión sobre os novos modos de comunicar na rede. O certame reforza especialmente este ano a presenza do galego como lingua de creación, conversa e pensamento no ecosistema dixital, cunha programación específica arredor dos contidos no noso idioma nas redes sociais, accións formativas para a mocidade, premios dirixidos a recoñecer o talento que crea na nosa lingua e novas oportunidades para a produción de proxectos audiovisuais nados no ámbito dixital.
A Cidade da Cultura celebrará o Día do Circo o vindeiro 19 de abril co espectáculo 'Sen patrón', da compañía galega Pistacatro, recoñecida co Premio Nacional 2025 desta disciplina artística. A proposta terá lugar no Xardín do Teatro, ás 17,00 horas, con entrada libre e de balde. Así, o Día do Circo convértese nun momento para celebrar tamén a chegada da primavera cunha proposta escénica aberta, festiva e accesible para todo tipo de públicos, que combina cabaré, números aéreos e malabares cunha dramaturxia que reivindica tanto técnicas circenses tradicionais como contemporáneas. Pistacatro é unha das compañías e produtoras de circo máis relevantes das artes vivas de Galicia, que traballa a prol da profesionalización do circo na Comunidade, impulsando as carreiras de artistas e traballadores do sector.
