jueves, 15 de enero de 2026
Mañá, ás 19,00 h., dará comezo con Days of Being Wild (1990) o ciclo Universo Wong Kar-wai, que ofrecerá as restauracións en 4k de sete dos seus filmes realizadas con motivo do vinte aniversario da estrea de In the Mood for Love (2000), título que o consagrou como imprescindible en calquera listaxe internacional de cinema de autor.
O especial da cinemateca da Xunta de Galicia inclúe tamén As Tears Go By (1988), que poderá verse este xoves ás 19.00 h, e xa en vindeiras datas Chungking Express, Fallen Angels, Happy Together, 2046 e a devandita In the Mood for Love.
Presentacións en liña
Tamén se reprograman nesta semana dous dos coloquios cinematográficos previstos inicialmente para finais do pasado mes de xaneiro. O mércores 24, ás 17,30 h., proxectarase o documental El año del descubrimiento, que tamén poderá verse o 2 de marzo, con motivo do que o CGAI conectará en liña co seu director, o realizador murciano Luis López Carrasco. Este novo traballo do autor de El futuro, considerado como unha figura única do cinema español, chega ás salas precedido dos premios nos festivais Cinéma du Réel de París, Bogotá, Toulouse ou Jeonju, así como do aplauso da crítica, que mesmo o definiu como o mellor filme español do ano.
Pola súa banda, o director aragonés Álvaro Orús presentará o venres 26, ás 19,00 h., outro documental: El principio del fin de las armas nucleares, no que recolle numerosos testemuños sobre a historia da ameaza nuclear a nivel mundial, os movementos na súa contra e os esforzos para incorporar ao dereito internacional o Tratado sobre a prohibición das armas nucleares. Xunto coa presentación en liña do seu realizador, o coloquio contará coa participación Marisa Fernández, presidenta da Asociación Mundo Sen Guerras.
Así mesmo, o sábado terá lugar unha nova cita coa sección CGAI Júnior, dentro da que ás 18,00 h. poderá verse El niño y la bestia, de Mamoru Hosoda.
A programación do CGAI, que durante o mes de marzo continuará recuperando as funcións adiadas, desenvólvese nunha única sesión diaria e con limitación da capacidade para dar cumprimento ao protocolo de control sanitario. Os pases son de entrada gratuíta
O virus respiratorio sincitial (VRS) continúa a aumentar a súa taxa de positividade e superou o 8 % na semana 2 do ano (do 5 ao 11 de xaneiro), segundo se recolle no informe semanal de seguimento deste virus que publica a Consellería de Sanidade. Nesta última semana, obsérvase un descenso na taxa de consultas en atención primaria por bronquiolite en menores de dous anos, en concreto, diminuíu nun 18,2 % con respecto á semana previa. En canto a hospitalizacións, rexistráronse dous ingresos na última semana na cohorte de nados entre abril e setembro de 2025 e unha hospitalización dun lactante menor de dous meses, que están a pasar a súa primeira onda do VRS.
O Diario Oficial de Galicia vén de publicar a orde do 30 de decembro de 2025 pola que se recoñecen as persoas deportistas de alto nivel, alto rendemento, rendemento deportivo de base e vitalicias, as persoas adestradoras ou técnicas, xuízas e árbitras recoñecidas de alto nivel, e se relacionan as solicitudes desestimadas e a súa causa. Con estas novas 158 incorporacións, o número total de deportistas galegos e galegas recoñecidos e recoñecidas segue batendo récords e chega xa a 1.773, sendo 740 mulleres (42%) e 1.033 homes (58%). Entre os deportistas recoñecidos destacan o loitador José Cuba, 20 veces campión de España; o xogador de balonmán David Faílde, subcampión do Mundo sub19; as padexeiras Estefanía Fernández e Lucía Val, campioas do Mundo no K4 500 ou o golfista Ignacio Mateo, clasificado para o Open de España.
