viernes, 6 de noviembre de 2026
O informe, presentado este xoves en Santiago de Compostela, está asinado polos expertos do Foro Económico de Galicia Patricio Sánchez, Francisco Armesto e Santiago Lago, baixo a coordinación do economista e ex presidente da Xunta de Galicia Fernando González Laxe. No documento, indícase en nota de prensa desde a entidade, sinálase que estes descensos do PIB veñen propiciados en Galicia, entre outros aspectos, por unha achega negativa tanto da demanda interna (-5,4 puntos porcentuais) como, en menor medida, da externa (-0,8). O investimento, engaden, tamén presenta unha caída interanual do 9,2 e o gasto das familias mingua un 6,9%.
Os datos
En canto á oferta, os expertos do Foro Económico de Galicia sinalan que os grandes sectores produtivos presentan en Galicia un mellor comportamento que no conxunto de España, agás o primario. O maior diferencial entre as taxas de variación interanual, detallan, rexístrase nas actividades profesionais, con caídas do 4,2% en Galicia e do 13,2% en España. Porén, a pesar desta leve mellora da competividade relativa da súa economía con respecto á media estatal, matizan, Galicia mantén a súa posición intermedia baixa na clasificación de comunidades autónomas.
No que atinxe ao emprego, desde a entidade xestionada polo Grupo Gen consideran que o mellor indicador da evolución é o número de horas traballadas. Novamente, explican, o axuste do emprego prodúcese en maior medida entre as persoas máis vulnerables: os máis novos, asalariados con contratos temporais, traballadores con xornadas a tempo parcial e persoas con menor nivel educativo. Asemade, engaden, a poboación ocupada redúcese en maior medida no caso das mulleres. No extremo contrario, os expertos resaltan o incremento de asalariados e asaliariadas con contrato indefinido e os empregados e empregadas do sector público.
Galicia-Norte de Portugal
O documento dedica tamén unha ampla análise comparativa ao comportamento económico de Eurorrexión Galicia-Norte de Portugal. Entre outros aspectos, nel saliéntase a necesidade de favorecer o crecemento do tamaño empresarial xa que na media da Eurorrexión o 62% das empresas non ten empregado ningún. De cara ao futuro, detallan os expertos do Foro Económico de Galicia, son as empresas máis grandes as que xeran emprego, implantan dixitalización e impulsan a I+D+i e a competividade do territorio. Tan só un 3,4% das empresas en Galicia e un 4,8% do norte de Portugal teñen dez ou máis asalariados, afirman.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur. De feito, destacan os altos rexistros acadados entre os días 9 e 15.
A Xunta de Galicia puxo en marcha a campaña de inmunización fronte á gripe e a COVID, que este ano incorpora como principais novidades a extensión da vacina antigripal de alta carga ás persoas de 65 a 69 anos e a ampliación do proxecto piloto de vacinación nos colexios a 75 centros educativos. O inicio oficial tivo lugar nun acto nas residencias de maiores e centros de discapacidade, o colectivo polo que arranca tradicionalmente a campaña debido á vulnerabilidade deste grupo fronte ás infeccións respiratorias.
