jueves, 5 de noviembre de 2026
Alfonso Rueda expuxo que o sector pesqueiro é o máis afectado na comunidade galega tras as negociacións sobre o Brexit e defendeu a necesidade de definir un marco de traballo constante e intenso co que defender os intereses das 1.700 persoas que faenan nos 150 buques galegos en augas británicas e do conxunto dos pescadores españois.
O Goberno galego lamenta que se empregue o sector da pesca como moeda de cambio para acadar un Acordo xeral que regule a relación comercial entre a Unión Europea e Reino Unido. Deste xeito, mentres que os produtos derivados da pesca británicos poderán entrar na UE sen aranceis, Galicia verá limitada a súa capacidade de pesca despois de que se acordase ceder o 25% do valor das capturas europeas ao Reino Unido ata 2026.
O vicepresidente da Xunta incidiu en que este acordo supón unha nova redución da actividade da frota galega en augas do Gran Sol, ao igual que se producira en 1986 coa adhesión de España á Comunidade Económica Europea, cando Galicia tivo que sacrificar o 70% da frota pesqueira que tiña nestes caladoiros. Ademais, advertiu de que a esta situación súmaselle a incerteza do que ocorrerá a partir de 2026 cando haxa que renegociar as cotas pesqueiras e a UE xa non terá unha posición de forza para negociar debido á entrega do acceso ao mercado europeo dos produtos mariños británicos.
Por outra parte, a Administración autonómica lamenta que Galicia aínda non recibise información de xeito oficial sobre o acordo por parte do Estado, tanto no sector da pesca no que se refire ao impacto do acordo sobre as distintas especies afectadas, como as contías da axuda da Reserva de Axuste ao Brexit coas que compensar aos sectores máis afectados.
A Xunta vén solicitando que se beneficie con este fondo ás rexións prexudicadas pola concentración de máis buques nas súas zonas de traballo, debido ao abandono de augas británicas, como é o caso de Galicia, e se inclúa este criterio, así como a influencia económica e non só a proximidade xeográfica co Reino Unido.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur. De feito, destacan os altos rexistros acadados entre os días 9 e 15.
A Xunta de Galicia puxo en marcha a campaña de inmunización fronte á gripe e a COVID, que este ano incorpora como principais novidades a extensión da vacina antigripal de alta carga ás persoas de 65 a 69 anos e a ampliación do proxecto piloto de vacinación nos colexios a 75 centros educativos. O inicio oficial tivo lugar nun acto nas residencias de maiores e centros de discapacidade, o colectivo polo que arranca tradicionalmente a campaña debido á vulnerabilidade deste grupo fronte ás infeccións respiratorias.
