sábado, 7 de noviembre de 2026
Tras a exhibición en setembro de The Blot, obra mestra dos anos vinte do pasado século, a cinemateca da Xunta de Galicia regresa á filmografía de Lois Weber para proxectar unha decena dos seus títulos, programados para o este venres día 4 (On the Brink, The Rosary, Suspense, Lost By a Hair, Idle Wives e Where are my children), o martes 15 (Fine Feathers e The Dumb Girl of Portici) e o martes 22 (Discontent, What Do Men Want? e Too wise wives).
Outro dos protagonistas desta carteleira será Robert Siodmak, cuxa destacada produción americana se define polo cultivo do drama psicolóxico, as achegas baseadas na súa estilización da posta en escena e a contribución ao espertar mesmo do cine negro. O ciclo, que terá continuidade no mes de xaneiro, amosará na Coruña a que foi a súa primeira película en Hollywood, La dama desconocida (martes 9 e mércores 10), e La escalera de caracol (martes 16 e o mércores 17). O xoves 11 será a quenda de Pesadilla e o mércores 23, de A través del espejo.
Festival de cultura electrónica
Documental, videoclip, performance ou videoarte formarán parte hoxe mesmo da sesión inaugural da sexta edición do festival Fanzine, FPS-BPM, que propón un percorrido por diferentes ámbitos nos que a música electrónica e a experimentación sonora se hibridan coa creación de vangarda audiovisual.
O CGAI é unha das tres sedes do encontro, no marco do que artistas galegos da traxectoria de Berio Molina ou Félix Fernández amosarán a súa particular relación coa música e co son. Así mesmo, estrearase en primicia o novo videoclip de Rayotaser, por Jairo Moreno, ademais de proxectarse a aclamada longametraxe documental The Rise of the Synths, de Iván Castell, sobre o movemento SynthWave. Ao final da sesión, os directores participarán nun debate, moderado polos programadores deste certame co afán de achegar o público á cultura electrónica.
Animación, máis filmes Fóra de Serie e distintas propostas para os sábados
A cinemateca galega tamén colabora coa cuarta edición do Festival Internacional de Cine de Animación da Coruña, que acolle o venres 18 de decembro. E xa dentro das súas seccións habituais, o Centro programa en Fóra de Serie dous filmes de Pedro Costa: o martes 1, Cabalo Diñeiro, e o xoves 3, a segunda sesión de Vitalina Varela.
Esta nova carteleira mensual complétase con distintas propostas para os sábados: Longa noite, de Eloy Enciso, que se poderá ver o día 5 dentro de Off Galicia; unha nova sesión de Desencadres sobre Stan Brakhage o día 12 e Luces de la Ciudad, de Charles Chaplin, o sábado 19 dentro do ciclo CGAI Júnior.
O Centro Galego de Artes da Imaxe continúa a concentrar as proxeccións nunha sesión diaria ás 19,30 h., de martes a venres, e ás 18,00 h. os sábados dando cumprimento ao protocolo de control sanitario. A entrada segue sendo gratuíta para todos os pases.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
