viernes, 26 de diciembre de 2025
A Filmoteca de Galicia recupera así os pases destas dúas cineastas, previstos inicialmente para o pasado mes de marzo, aos que se lles suma agora unha sesión centrada en Dore O. No seu caso, exhibiranse Frozen Flashes, Blonde Barbarei e Kaskara, que chegará á Coruña o día 25 en colaboración co Festival de Sevilla.
Tamén en novembro, o público cinéfilo terá a oportunidade de afondar na filmografía do membro máis destacado do movemento situacionista a través do ciclo Guy Debord (1932-1994): Contra o cinema. O francés orientou a súa actividade cinematográfica cara á negación permanente da institución, feito que na práctica representou unha aplicación experimental da directriz situacionista de superación da arte. Así, por exemplo, a súa primeira acción pública consistiu na proxección dunha película sen imaxes e a última en privar o mundo da posibilidade de ver as súas películas.
Copias dixitais restauradas
Este especial presenta os xoves 12, 19 e 26 deste mes novas copias dixitais restauradas das seis películas de Guy Debord, montadas e realizadas entre 1952 e 1978, tendo en conta que o seu último filme non se amosou publicamente ata 1981. A primeira delas será Hurlements en faveur de Sade (1952), baseada na creación de situacións para xerar unha antipelícula na que xa apunta a senda que seguirá a súa obra cinematográfica.
Os dous títulos seguintes, Sur le passage de quelques personnes à travers une assez courte unité de temps (1959) e Critique de la séparation (1961) aparecen inscritas no movemento de axitación cultural e política que promove a Internacional Situacionista (1957-1972) creada por Debord: rescatar a vida, esta última convertida en mercadoría, segundo a lóxica do espectáculo.
Ademais, no CGAI poderá verse a adaptación fílmica de 1973 do seu mítico ensaio A sociedade do espectáculo, que reúne un torrente de imaxes apropiadas e resignificadas (westerns e cine bélico de Hollywood, propaganda soviética, publicidade, pornografía...) xunto cunha análise teórica e política da sociedade a través da voz en off do propio autor. As críticas e oposicións a esta fita foron contestadas dous anos despois polo mesmo Debord en Réfutation de tous les jugements, tant élogieux quhostiles, qui ont été jusquici portés sur le film La société du spectacle.
Este periplo cronolóxico pola súa filmografía concluirá con In girum imus nocte et consumimur igni, unha reflexión sobre o situacionismo a modo de fin de festa onde o autor manifesta o seu rexeitamento a unha sociedade narcotizada e autocompracente.
Continúa a retrospectiva de Angela Schanelec
En novembro, o CGAI continuará coa súa completa retrospectiva da cineasta alemá Angela Schanelec, unha das voces máis destacadas da chamada Escola de Berlín. Programaranse cinco novos pases o mércores día 4 (Passing Summer, 2011), o venres 6 (Marseille, 2004), o mércores 11 (Afternoon, 2007), o venres 13 (Orly, 2010) e o mércores 18 (The Dreamed Path, 2016).
Xa a finais de mes, o día 27 levarase a cabo a primeira proxección de Vitalina Varela, de Pedro Costa, da que haberá unha segunda sesión en decembro. O filme narra a historia dunha muller de 55 anos procedente de Cabo Verde que chega a Lisboa tres días despois de celebrar o funeral do seu marido, emigrado tempo atrás, nun momento que agardou durante máis de 25 anos.
Lois Patiño
Tamén destaca nesta carteleira de novembro a sesión dedicada a Lois Patiño, coincidindo coa estrea comercial de Lúa Vermella. Así, a sección Off Galicia/NCG10 proxectará os seus traballos Costa da Morte e Fajr o sábado 14 de novembro.
En novembro CGAI continúa a concentrar as proxeccións nunha única sesión diaria ás 19,30 h. de martes a venres e ás 18,00 h. os sábados, dando cumprimento ao protocolo de control sanitario. A entrada seguirá sendo gratuíta.
Cerca do 90% das empresas galegas con máis de 10 persoas empregadas utiliza aplicacións de software libre e a porcentaxe é de máis do 67% no caso das microempresas. Os datos forman parte do estudo O Software Libre nas Empresas de Galicia elaborado polo Observatorio da Sociedade da Información en Galicia (Osimga), adscrito á Axencia para a Modernización Tecnolóxica de Galicia. Os datos proceden da Enquisa sobre o uso de TIC e comercio electrónico nas empresas, que realiza o INE anualmente, que cede os datos a OSIMGA en virtude do convenio de colaboración. Entre os programas máis utilizados destacan os navegadores de Internet (95,5%), as aplicacións ofimáticas (75,3%) e os sistemas operativos libres (51,5%).
A Consellería de Sanidade publica, na súa páxina web, o informe de actividade das infeccións respiratorias agudas correspondente á semana do 15 ao 21 de decembro, que sinala que a actividade gripal en Galicia continúa con intensidade media e con tendencia decrecente. Segundo os datos recollidos polo servizo de vixilancia epidemiolóxica da Dirección Xeral de Saúde Pública, xa se acadou o pico da onda epidémica da gripe. Respecto da semana anterior, rexístrase un descenso na taxa de consultas por gripe en atención primaria dun 5 %.
