sábado, 7 de noviembre de 2026
Segundo explicou Anxo M. Lorenzo, na selección de pezas priorizouse a pertinencia das obras e artistas na colección CGAC e un equilibrio de xénero entre as propostas de galerías e autores sen representación. As obras escollidas responden a criterios valorativos diversos, entre eles a calidade das obras, a súa representatividade na traxectoria artística do elixido ou que poidan inserirse no relato artístico da colección do CGAC.
Obras seleccionadas
As obras seleccionadas que pasan a formar parte da colección CGAC pódense consultar directamente na páxina Web do CGAC, no seguinte enlace: http://cgac.xunta.gal/GL/contido/CONVOCATORIAS.
O representante da Consellería de Cultura, Educación e Universidade lembrou que a finalidade desta convocatoria que agora se resolve é contribuír ao apoio ao sector artístico, un dos sectores culturais afectados pola crise derivada da pandemia, ao tempo que favorecer o enriquecemento do patrimonio público e apoiar a actividade das artes plásticas e dos creadores. Con este cometido, a Xunta de Galicia impulsou o Plan de reactivación dos sector cultural, unha folla de ruta creada con fin de manter o tecido das industrias culturais, con medidas de reacción desde a administración.
Ademais, estas adquisicións de carácter extraordinario están enmarcadas no Xacobeo 2021, potenciando a capacidade desta celebración de transformar, innovar e enriquecer Galicia. Así, fortalécese o vínculo entre o CGAC e o Xacobeo, poñendo o foco sobre a arte galega cunha continuidade no tempo que o proxecta cara os futuros anos santos, ao tempo que se integra a artistas galegos que ou ben non estaban presentes ou non suficientemente representados.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
