martes, 6 de octubre de 2026
As negociacións no ámbito europeo son complicadas pero o reto ao que nos enfrontamos é enorme: as desigualdades sociais víronse exacerbadas drasticamente polo devastador impacto da Covid-19 en toda Europa, o que socavou unha década de progreso en tan só seis meses. A aprobación de Next Generation EU debe ser unha prioridade por encima das loitas interinstitucionais. Non podemos permitirnos o luxo de demorar a posta en marcha do novo instrumento de recuperación europea, apunta o director xeral de Relacións Exteriores e coa UE, Jesús Gamallo, quen representou a Galicia neste 140º pleno.
Por primeira vez, un pleno do CdR contou coa participación da Presidencia do Consello da Unión, que actualmente corresponde á chanceler alemá, Angela Merkel. Tamén participou por primeira vez a presidenta da Comisión Europea, Ursula Von der Leyen, quen puxo en valor a resposta dos entes locais e rexionais durante a xestión da crise e recalcou a importancia das administracións locais e rexionais á hora de aplicar o Next Generation EU, xa que, segundo Von der Leyen, o obxectivo deste instrumento non é unicamente económico, senón que haberá de servir para mellorar o aire que respiramos nas nosas cidades ou para axudar ás pequenas empresas a adoptar solucións dixitais.
Recomendacións sobre 26 medidas lexislativas e debate con catro comisarios
Este pleno caracterizouse por unha axenda moi cargada, na que destacan os debates cos comisarios responsables do Pacto Verde Europeo, Cohesión, Economía e Emprego, ademais de co presidente do Banco Europeo de Investimentos. Os membros do CdR tiveron así a oportunidade de avaliar a posible contribución da UE aos esforzos de recuperación locais e rexionais.
Durante os tres días (12-14 de outubro) do pleno do CDR, os membros desta asemblea tamén debateron e aprobaron ditames sobre vinte e seis dossieres da axenda comunitaria como a nova estratexia industrial europea, o libro branco sobre a Intelixencia Artificial ou o Plan de Acción sobre Economía Circular. Galicia presentou 18 emendas a cinco destes ditames.
Participación de Galicia no Comité Europeo das Rexións
O Comité das Rexións é a asemblea consultiva na que están representados os entes locais e rexionais da Unión Europea. En representación da Comunidade Autónoma de Galicia, o membro titular é o propio presidente da Xunta de Galicia, mentres que o cargo de membro suplente recae no director xeral de Relacións Exteriores e coa UE. A Fundación Galicia Europa presta apoio á participación galega nesta asemblea.
O conselleiro de Facenda e Administración Pública, Miguel Corgos, avanzou hoxe que as contas da Xunta para o ano 2027 continuarán a reforzar o gasto social, cunha suba por riba da media do crecemento do orzamento e con melloras no acceso á vivenda, a máxima prioridade desta lexislatura. Así mesmo, o Goberno galego seguirá comprometido coa transformación do modelo produtivo cunha aposta polo investimento en I+D+i e pola mellora da formación para impulsar o crecemento empresarial. Ademais de aproveitar a riqueza dun Xacobeo 2027, 'que queremos que sexa o mellor da historia'.
O conselleiro de Cultura, Lingua e Xuventude, José López Campos, compareceu hoxe a petición propia no Pleno do Parlamento de Galicia para dar conta das preto de 700 medidas recollidas no novo Plan xeral de normalización da lingua galega. Fíxoo despois de que a maioría das formacións políticas con representación na Cámara galega chegasen a un acordo para enriquecer este texto froito do traballo de preto de dous anos feito por expertos con achegas de entidades, institucións e particulares. Neste senso, o responsable autonómico de Lingua agradeceu a colaboración e implicación de todos os profesionais que participaron, baixo a coordinación do académico Manuel González, na elaboración deste documento.
