sábado, 7 de noviembre de 2026
A cidade de Santiago acollerá a segunda edición do festival de música culta Ateneo Barroco grazas á súa inclusión en 'O teu Xacobeo, o programa da Xunta, de apoio ás actividades culturais e sociais que se desenvolven en Galicia ao abeiro da celebración do Ano Santo e o Camiño de Santiago.
Así, Ateneo Barroco abre a segunda edición de O Teu Xacobeo, nun ano complicado, como sinalou a comisaria do Xacobeo 2021, Cecilia Pereira, na presentación deste ciclo de concertos e cuxa celebración sinalou como parte destacada xa da axenda anual de actividades culturais de Santiago de Compostela.
Pereira lembrou que este festival naceu precisamente da man de O Teu Xacobeo, un programa con propostas pequenas e grandes, pero todas elas feitas desde a cidadanía, das asociacións e co fin de compartilas co público baixo un mesmo sentir, o sentir do Camiño de Santiago.
Fomento da cultura
A comisaria do Xacobeo 2021 manifestou nesta presentación que para o Xacobeo é un acerto apoiar iniciativas que fomenten a cultura e, en concreto, un festival coma este que abre as portas ao outono , non só a través de concertos, senón tamén moi acertadamente con relatorios e proxeccións, porque a música vai máis aló da propia música.
Cecilia Pereira tamén destacou que este é un festival que comparte a multiplicidade, un aspecto moi do Camiño de Santiago, pola conexión entre compositores galegos ou residentes en Galicia con outros doutros países, o que favorece o intercambio e o debate no marco da Ruta Xacobea.
O barroco é sinónimo de Compostela engadiu a comisaria- e o peregrino que chega ao Obradoiro atopa ese impoñente perfil barroco que o conecta con esa época artística tan florecente e que todos admiramos hoxe.
A segunda edición de Ateneo Barroco comezará o vindeiro día 5 de outubro cunha conferencia inaugural e traerá a Santiago de Compostela cinco concertos e relatorios sobre instrumentos e o ciclo cinema que se celebrarán en distintos espazos cedidos polo Concello e a Universidade.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
