lunes, 21 de septiembre de 2026
O director xeral de Relacións Exteriores e coa UE, Jesús Gamallo, reuniuse hoxe en Vigo coa vicepresidenta da Comisión de Coordinación e Desenvolvemento do Norte de Portugal (CCDR-N), Ester Silva.
Na reunión analizáronse as propostas e achegas que están a ser incluídas no Plan de reactivación á cooperación de proximidade, un documento elaborado en coordinación con todos os actores da cooperación transfronteiriza que persegue paliar o impacto do peche, durante varios meses, da fronteira entre España e Portugal por mor da crise do sanitaria da covid-19.
Ao encontro tamén asistiron Xosé Lago e Graça Fonseca, director e subdirectora da Agrupación Europea de Cooperación Territorial (AECT) da Eurorrexión, respectivamente, que se celebrou na sede desta organización en Vigo. Tamén participou Pedro Figueredo, xefe de División de Coordinación de Proxectos e Redes Institucionais na CCDR-N.
Trátase da terceira das reunións mantidas para elaborar o Plan de reactivación na fronteira Galicia-Norte de Portugal, elaborado pola AECT da Eurorrexión. A primeira celebrouse no concello de Tomiño o pasado 18 de xuño e a segunda tivo lugar na Eurocidade Chaves-Verín o 2 de xullo.
A AECT da Eurorrexión foi constituída pola Xunta de Galicia e a Comisión de Coordinación e Desenvolvemento Rexional do Norte de Portugal para impulsar a cooperación transfronteiriza entre os dous territorios. Comezou a funcionar en 2010 e foi a primeira que se se constituíu na Península Ibérica e a terceira do territorio europeo.
Nos últimos anos leváronse a cabo proxectos como o Iacobus, de intercambio de estudantes e docentes da Eurorrexión, ou o programa Nortear, de intercambios culturais.
Medio milleiro de investigadoras e investigadores e máis de 150 actividades científicas nas sete cidades galegas: Vigo, Ourense, Pontevedra, Santiago, A Coruña, Ferrol e Lugo. Así se celebrará en Galicia a sexta edición da Noite Galega das Persoas Investigadoras, G-Night 2026, unha actividade na que a comunidade científica galega une talento e esforzos co obxectivo de achegar a ciencia á cidadanía e espertar vocacións científicas, ao tempo que se ofrecen propostas de lecer científico, cultural e educativo para toda a familia.
A Xunta de Galicia reclama ao Goberno central medidas estruturais de apoio ao sector agrogandeiro. Do mesmo xeito, esíxese que se teña en conta a realidade de cada territorio á hora de levar a cabo estas actuacións, que deben executarse de xeito urxente. Así o trasladou a conselleira do Medio Rural, María José Gómez, na Conferencia Sectorial celebrada en Madrid, na que se dirixiu ao ministro de Agricultura, Pesca e Alimentación, Luis Planas, para facer estas reclamacións. Alí, reafirmou tamén o compromiso do Executivo galego con este sector.
