jueves, 29 de octubre de 2026
O conselleiro de Economía, Emprego e Industria, Francisco Conde, participou hoxe de xeito telemático na constitución da Mesa da Automoción, na que demandou ao Goberno que concrete e axilice as medidas para facilitar a compra de vehículos eficientes de motor diésel e de gasolina.
Conde lembrou que a Mesa da Automoción é unha iniciativa das nove comunidades autónomas que contan cun fabricante no seu territorio, e pediu unha estratexia común xunto co Ministerio de Industria, Comercio e Turismo para identificar cales son os proxectos de futuro que poden permitir dotar de competitividade o sector.
O conselleiro apuntou que por parte de Galicia hai un compromiso para impulsar proxectos vinculados á dixitalización e á mobilidade sustentable, non só a través do vehículo conectado e o eléctrico, senón tamén a través do coche impulsado por hidróxeno verde. Conde salientou que este é un dos proxectos tractores promovidos en Galicia de cara a futuro, co obxectivo de favorecer a mobilidade sustentable.
O que precisamos é que o Goberno concrete as diferentes medidas dentro do plan da automoción subliñou o conselleiro, quen fixo fincapé en que se trata dun plan que se desenvolveu á marxe das comunidades autónomas, e que esperamos que o Goberno volva á senda do consenso para concretar cales son as medidas a curto prazo para favorecer os investimentos, o I+D+i do sector da automoción, e tamén para favorecer ese plan de renovación de vehículos impulsados por combustión. Neste ámbito, explicou que as axudas deben permitir non só esa renovación do parque senón tamén favorecer a demanda.
O proxecto Xenoma Galicia, que conta cun investimento de 20 millóns de euros, ten por obxecto recompilar o ADN de 400.000 galegos para identificar os xenes relacionados co cancro de mama e ovario hereditario, a síndrome de Lynch e a hipercolesterolemia familiar. Ata o de agora, foron analizadas 3.112 mostras biolóxicas. En concreto, 1.037 mostras de sangue na primeira pilotaxe do proxecto, 796 de saliva no segundo piloto e, coa primeira fase do proxecto en marcha, 1.279 mostras dos voluntarios dos primeiros distritos participantes. A análise das mostras destes 1.279 participantes da fase 1 permitiu detectar 25 novos casos positivos. En concreto, 14 participantes deron positivo en cancro de mama e ovario hereditario, dous na síndrome de Lynch e nove en hipercolesterolemia familiar.
A Pedreira e Fillas de Cassandra estarán presentes no Womex 2026, o máis importante encontro mundial das músicas folk e de raíz que se celebra ata este domingo en Las Palmas de Gran Canaria. Trátase dunha iniciativa que ofrece aos artistas e ás empresas galegas un espazo para dar a coñecer o seu traballo ante programadores, festivais, axencias de contratación e outros profesionais de diferentes países. A artista foi escollida por un xurado internacional independente para formar parte dos Official Showcases, a selección oficial de concertos coa que Womex achega aos profesionais propostas das músicas do mundo.
