sábado, 7 de noviembre de 2026
A secretaria xeral de Emprego, Covadonga Toca, valorou hoxe os datos de paro rexistrado do mes de maio, estatísticas que reflicten que, tras os aumentos de marzo e abril polas consecuencias da covid-19, Galicia logra cambiar a tendencia.
Así, Galicia logra diminuír o paro en maio un 0,29% con respecto ao mes de abril, o que supón 547 desempregados menos e segue situándose a niveis inferiores aos de hai 11 anos. Este dato posiciona a Galicia como a quinta Comunidade cun mellor comportamento en termos absolutos e a sexta en relativos fronte ao incremento do desemprego a nivel nacional nun 0,69%. O paro tamén baixou nas provincias de Pontevedra e da Coruña e na cidade de Vigo. Os efectos da covid-19 seguen manténdose no sector servizos, o único no que medra o desemprego (+0,15%), que diminúe na construción (-4,65%), a agricultura e a pesca (-1,46%) e a industria (-0,50%). Este mes, ademais, subiu a contratación un 29,32% grazas á sinatura de 6.999 contratos máis que en abril. En canto ás afiliacións, Galicia rexistra unha suba do 0,16% e suma 1.603 cotizantes á Seguridade Social ata alcanzar os 976.374 afiliados, o que supón unha media de 51 ao día.
No tocante á evolución anual, Toca indicou que Galicia encadeaba seis anos consecutivos de baixadas interanuais nun mes de maio, que se ven interrompidos polos efectos da covid-19. Así, Galicia suma 30.277 persoas máis desempregadas (un 18,83% máis que hai un ano), 8 de cada 10 do sector servizos, onde se concentran 24.759 desempregados. Aínda así, o desemprego medra case seis puntos e medio menos que na media nacional. En canto ás afiliacións, diminúen un 4,13%, a un ritmo lixeiramente inferior ao estatal, na que se reducen un 4,56%.
Toca destacou que é o momento de iniciar a recuperación do terreo perdido durante os últimos dous meses en materia laboral e volver á tendencia positiva que se rexistraba antes da covid-19, con medidas que nazan da unidade, o consenso e o diálogo social, como os 16M para reactivar a actividade de 27.000 autónomos e pemes do comercio, o turismo, os servizos e o transporte; os 8M para complementar as prestacións de menor contía de traballadores afectados por Ertes e para maiores de 55 anos que perderon o seu emprego; ou os 40M para afondar na dixitalización do tecido empresarial, sobre todo nos negocios de comerciantes, autónomos e pemes.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
