sábado, 7 de noviembre de 2026
Cómpre destacar que, a través de Galicia, na túa casa, a rede de museos da Xunta contabilizou máis de 4000 accesos ás visitas virtuais, unha cifra que multiplica por cinco o número de visitas no mesmo período do ano pasado e que representa case tantas visitas virtuais como en todo o 2019. Así mesmo, a exposición Galicia, un relato no mundo, foi visitada a través desta iniciativa por case 3000 persoas. Este recurso online foi establecido tras o peche un mes antes por mor do coronavirus da exposición na Cidade da Cultura, que visitaron presencialmente máis de 43.000 persoas.
Catedral de Santiago
Este microsite permite facer un percorrido por algúns dos lugares máis emblemáticos da cidade de Santiago de Compostela, declarada Patrimonio da Humanidade, incluíndo as prazas que rodean a Catedral. É posible, ademais, regresar ao templo catedralicio actualmente pechado e facer unha visita virtual ao museo da propia basílica xacobea.
Xunto a esta visita, Galicia, na túa casa, tamén propón percorridos virtuais polas outras catro catedrais galegas: a de Lugo, a de Mondoñedo, a de Ourense e a de Tui. Ademais, están dispoñibles diferentes tours en 360º por máis de 70 mosteiros, igrexas e conventos galegos para coñecer mellor o legado arquitectónico, cultural e relixioso.
Inclúense percorridos por algúns dos atractivos da Ribeira Sacra, a candidata española a Patrimonio Mundial en 2021, como por exemplo o Mosteiro de San Pedro de Rocas, único por ser escavado en rocha natural, ou o de Santa Cristina de Ribas de Sil.
Tamén se permite facer unha viaxe virtual a vestixios arquitectónicos dos estilos prerrománico e mozárabe como Santa María de Mixós, en San Mamede (Ourense); do gótico como as ruínas do convento de Santo Domingo, en Pontevedra, ou o claustro de San Francisco, en Ourense; do estilo renacentista como o Bon Xesús de Trandeiras en Xinzo de Limia ou o colexio de Nosa Señora Antiga en Monforte de Lemos; ou do neoclásico como o convento das Madres Mercedarias en Santiago, entre outros.
Sete idiomas
Ademais, é posible achegarse desde a casa a emprazamentos como o Castro de Viladonga, as Pallozas e conxuntos etnográficos do Cebreiro, así como aos museos xestionados pola Xunta. A iniciativa está dispoñible para público nacional e internacional, xa que é posible acceder a esta información en sete idiomas. Con Galicia, na túa casa, continúase a ofrecer alternativas que promovan o destino con propostas para desfrutar desde a casa a través de internet no marco da iniciativa #aculturasegue.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
