sábado, 7 de noviembre de 2026
A sede do Centro Dramático Galego (CDG) en Santiago ábrelle esta semana as súas portas a unha nova residencia artística, previa á estrea este xoves 12 do espectáculo O premio por La Quintana Teatro, en coprodución coa compañía da Xunta de Galicia. A formación coruñesa regresa así ao Salón Teatro, onde o pasado mes de outubro presentou a versión en galego de Desde lo invisible, o seu aplaudido espectáculo de debut.
O CDG préstalle agora apoio económico e técnico para a súa nova montaxe, ademais de cederlle as súas instalacións para os últimos ensaios antes das catro primeiras funcións públicas, que terán lugar nos horarios habituais do espazo compostelán: xoves, venres e sábado, ás 20,30 h., e o domingo, ás 18,00 h.
Marián Bañobre dirixe O premio a partir dun texto de Santiago Cortegoso, que levan a escena Victoria Teijeiro, Xurxo Cortázar e Raquel Espada, quen é candidata a mellor actriz secundaria nos Premios de Teatro María Casares por Neorretranca e posmorriña, a última produción do Centro Dramático Galego.
Ideada como creación colectiva, O premio é unha comedia aceda ambientada nun futuro próximo, no que o progreso tecnolóxico e a presión por lograr o éxito laboral, sentimental e social levan os cidadáns a un estado de desánimo e frustración, agravado por unha gran crise económica por mor do envellecemento da cidadanía. Para enfrontar esta situación, os dirixentes poñen en marcha unha insólita e popular medida: crear un reallity en directo, onde é o público quen decide que concursante merece levar o premio da súa vida: Morrer logrando a fama. Todo por un soño.
Interacción directa co público
A interacción cos espectadores é clave no desenvolvemento deste programa e, xa que logo, do espectáculo, no que o traballo actoral e de investigación arredor das novas formas teatrais se apoia nos vídeos a través dos que se comparte a vida dos protagonistas.
O premio é o quinto espectáculo de La Quintana Teatro, para o que ademais de co apoio do CDG, conta con Escenate e Zeena Producciones na produción e co Ayuntamiento de Madrid como outra das entidades coprodutoras. No equipo artístico e técnico, atópanse así mesmo Marisa de Laiglesia (escenografía e vestiario), Javier Quintana (deseño de iluminación), Anxo Outumuro (técnico de luces), Lucía Estévez (vídeo), José Luis Fraga (creación sonora) e María Moral (distribución).
A compañía coruñesa, que comezou a súa traxectoria hai 12 anos co gran éxito de público e crítica de Desde lo invisible, Premio MAX 2008 ao mellor espectáculo revelación, continuou avanzando no seu traballo de creación colectiva e investigación en títulos como Innómines, Realidade e O bolso ou a vida. En 2018 reestreou no Teatro Valle Inclán do Centro Dramático Nacional Desde lo invisible, co que fixo unha estadía en El Pavón Teatro Kamikaze de Madrid, ademais de visitar o Salón Teatro, entre outros espazos dentro e fóra de España.
As entradas para as funcións de estrea de O premio en Santiago xa están á venda na web entradas.abanca.com e no teléfono 902 434 443, cos prezos e descontos habituais. Tamén poderán adquirirse no despacho de billetes do Salón Teatro, aberto ao público os días de representación desde dúas horas antes do comezo do espectáculo.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
