martes, 16 de junio de 2026
Na rolda de prensa na Cidade da Cultura para anunciar esta segunda edición, o director xeral de Políticas Culturais, Anxo M. Lorenzo, valorou a boa acollida que tivo a primeira convocatoria ‒que se celebrou fai agora un ano‒ e que obrigou a activar unha listaxe de agarda, debido ao alto número de peticións tras cubrirse case de inmediato as prazas ofertadas. Un interese que, segundo argumentou, animou á Fundación Cidade da Cultura a repetir a colaboración coa Rolling Words nun eido tan relevante para o sector cultural galego como é o da literatura.
Queremos incidir en accións que tiren partido da potencialidade de Galicia para exportar autores e autoras emerxentes, xerando unha comunidade dinámica onde os referentes compartan o seu coñecemento cos talentos aínda por descubrir, explicou.
Na rolda de prensa ‒que contou coa participación da directora-xerente da Fundación Cidade da Cultura, Ana Isabel Vázquez‒ interviñeron a directora de Rolling Words, Lourdes Díaz, e o director do obradoiro, Javier Peña, que é tamén escritor e xornalista e estará entre os mestres e mestras que o impartan, ao igual que fixo na pasada edición.
Precisamente, ambos os dous gabaron o talento e o potencial das e dos participantes da primeira edición. No entanto, Lourdes Díaz advertiu da dificultade actual coa que se atopa a xente que escribe, non para editar, senón para destacar entre a maraña de publicacións. Por este motivo, considerou necesarias formacións especializadas, como a que ofrece este obradoiro para axudar a dar o salto ao profesionalismo.
Nesta mesma liña se pronunciou Javier Peña, quen lembrou que, a diferenza doutras comunidades como Madrid, Aragón, Valencia ou Cataluña, en Galicia existe un certo baleiro en escolas de escritura creativa, especialmente naquelas dirixidas a persoas adultas, matizou, ao tempo que aclarou que as iniciativas neste campo adoitan ser puntuais e impulsadas por asociacións, pequenas editoriais e librerías.
Ante esta descrición do panorama actual, o director xeral de Políticas Culturais remarcou que o Obradoiro de Novela Cidade da Cultura de Galicia aspira a encher este oco. Deste xeito, o curso está deseñado non só para que os participantes aprendan a manexar os recursos da escrita, senón tamén a moverse no sector. Accederán así a contactos profesionais de calidade e, no caso de demostrar un talento literario sobresaínte, poderán tamén ingresar na nómina de autores e autoras representados por Rolling Words.
Nove clases presenciais para aprender da man de quen escribe
Autores cunha traxectoria recoñecida tanto dentro como fóra de Galicia forman parte do profesorado do Obradoiro de Novela Cidade da Cultura, que se desenvolverá entre o 6 de marzo e o 27 de xuño na Biblioteca e Arquivo de Galicia do Gaiás con nove clases presenciais.
Ademais de Javier Peña ‒que acaba de publicar en Blackie Books a novela Infelices‒ tamén imparten o curso Antón Riveiro Coello ‒o último Premio Torrente Ballester‒ e Miguel Anxo Fernández, Xabier Quiroga, Arantza Portabales, Manuel Gago e Diego Giráldez. A experiencia desde o mundo da edición virá da man de Lourdes Díaz e do consultor editorial Siscu Pérez. Todos eles serán os encargados de fornecer os aspirantes a novelistas das ferramentas e recursos necesarios para levar adiante os seus propios proxectos literarios.
Ao longo de nove sesións formativas, os escritores e escritoras compartirán os seus coñecementos sobre o estilo, os xéneros narrativos, a creación de personaxes ou a estrutura e tempos da novela. O obradoiro contará tamén con especialistas do mundo editorial, que ofrecerán as claves para afondar no mercado literario.
Microrrelato sobre o Camiño de Santiago
As e os participantes levarán a cabo distintos exercicios como a elaboración dun microrrelato sobre o Camiño de Santiago, xa que esta segunda edición forma parte da programación do Xacobeo 2021.
A fase práctica iniciarase o 22 de maio, unha vez finalizadas estas clases formativas. A partir desta data, solicitaráselles que escriban as primeiras 40 páxinas dunha novela, na que amosen os coñecementos aprendidos durante o curso. A corrección do traballo farase de forma individual nunha última clase, o 26 de xuño, antes de pechar a actividade cunha cerimonia de clausura e entrega de diplomas o 27 de xuño.
A posta en marcha do Rexistro galego de persoas centenarias, Regace, sitúa Galicia nunha posición de referencia para o estudo da lonxevidade, posibilitando coñecer mellor as claves deste fenómeno e afrontar os retos que presenta. Preto de 1.800 persoas de cen ou máis anos viven na comunidade galega, o que supón ao redor do 12 % de toda a poboación centenaria de España, un dato que fala da realidade demográfica de Galicia e reflicte unha oportunidade única para aprender, investigar e avanzar. Deste xeito, Galicia presenta un dos mellores resultados no que a esperanza de vida se refire: 81,19 anos para os homes e 86,83 para as mulleres, superando en ambos os casos a media estatal.
A mostra a 'Illa ignorada' estará aberta ata o 12 de febreiro de 2027 e toma o seu título do primeiro poemario da escritora Gloria Fortes. Nela cabe destacar os traballos tanto dos artistas galegos Alberto Ardid, Vicente Blanco, Andrea Costas, Caxigueiro, Fina Mantiñán, Juan Carlos Meana, Ariadna Silva, Seoane e María Elena Montero, como os de Abel Azcona, Amparo Garrido, Regina Giménez, Antoni Muntadas, Sonia Navarro, Íñigo Royo, Regina Silveira. Ademais desta nova mostra, o centro tamén inaugurou a ampliación, no dobre espazo do Centro Galego de Arte Contemporánea, da exposición Misha Bies Golas, que abriu ao público o pasado 22 de maio cunha escolma de máis de dúas décadas da creación heteroxénea do lalinense Miguel Calvo Ulloa, un dos fundadores do colectivo Nova Escultura Galega.
