sábado, 7 de noviembre de 2026
O director xeral de Políticas Culturais da Xunta, Anxo M. Lorenzo, presidiu hoxe a reunión do Consello de Cooperación Bibliotecaria coa participación de representantes das bibliotecas de xestión autonómica, das bibliotecas municipais, dos centros privados integrados na Rede de Bibliotecas Públicas de Galicia, das bibliotecas escolares de ensino non universitario e das asociacións de bibliotecarios.
Durante a sesión déronse a coñecer os datos relativos a GaliciaLe 2019, a plataforma de préstamos de obras en formato electrónico das bibliotecas públicas galegas e que ten como obxectivo facilitar o acceso de toda a cidadanía á cultura en calquera momento a través dos seus catálogos en galego e castelán. Así, no pasado ano rexistráronse un total de 56.144 préstamos, o que supón un incremento de preto do 62% con respecto ao ano 2018. O número de usuarios activos ascende a preto de 2400 no catálogo galego e supera a cifra de 4900 no catálogo en castelán. Isto supón unha alza do 34% e do 46% respectivamente en comparación ao 2018.
A Xunta de Galicia incrementou nos últimos anos o orzamento destinado á adquisición de títulos para GaliciaLe, un esforzo que se traduce na adquisición dun maior número de licenzas, polo que máis lectores puideron acceder a un mesmo título simultaneamente. Na actualidade, a colección desta plataforma está constituída por preto de 4600 títulos entre libros electrónicos, revistas, películas, audiolibros, libros interactivos e banco de datos. No que se refire aos títulos máis prestados, Infamia, de Ledicia Costas, ocupa o primeiro posto no catálogo galego, e La hija del relojero, de Kate Morton, foi o título máis lido no catálogo en castelán.
Anxo M. Lorenzo tamén deu conta do proceso de implantación do programa de xestión bibliotecaria para a Rede de Bibliotecas de Galicia, Koha, que se atopa na súa terceira fase e que rematará o vindeiro mes de xuño. Este período, comezado en setembro de 2018, permitiu a integración de 80 bibliotecas públicas no Catálogo da Rede de Bibliiotecas de Galicia. Co obxectivo de que o persoal das bibliotecas coñeza Koha e de que teñan as ferramentas necesarias para ofrecer a mellor experiencia aos usuarios, a Consellería de Cultura e Turismo realizou o pasado ano 11 cursos de formación nos que se explicou o funcionamento dos distintos módulos do programa e realizáronse prácticas.
Así mesmo, a sesión do Consello serviu como marco para anunciar que a Xunta convocará as terceiras xornadas de bibliotecas públicas que se celebrarán en outubro, así como o 3º Premio de Innovación Bibliotecaria.
Calendario do Libro e da Lectura 2020
O aniversario do nacemento de Rosalía de Castro, o Día das Letras Galegas que se dedicará este ano a Ricardo Carvalho Calero, ou o centenario da publicación da revista Nós, son algunhas das celebracións que promove a Consellería de Cultura e Turismo a través do Calendario do Libro e da Lectura 2020 tal e como se tratou nesta sesión do Consello de Cooperación Bibliotecaria.
O obxectivo deste calendario é impulsar a realización de actividades arredor das principais datas e efemérides vinculadas co libro e coa lectura, e facilitar a planificación anual das actividades culturais.
Deste xeito, o Día da lingua materna o 21 de febreiro comparte protagonismo co aniversario do nacemento de Rosalía de Castro o día 24. Co mes de marzo chega a celebración do Día da narración oral o día 20, o Día da poesía o 21 e o Día do teatro o 27. No mes de abril tamén se celebra o Día das Artes Galegas o día 1, que este ano dedícase a Domingo de Andrade, mentres que os días 2 e 23 conmemóranse o Día do Libro Infantil e Xuvenil e o Día do Libro, respectivamente. Así mesmo, o día 26 celebrarase o Día da Propiedade Intelectual.
O mes das Letras homenaxea nesta ocasión a Ricardo Carvalho Calero, a quen a Real Academia Galega dedica o 17 de maio e ao día seguinte celebrarase o Día dos Museos. Previamente, o 3 de maio celebrarase o Día da Liberdade de Prensa. O día 9 de xuño recordarase a importancia dos arquivos coa celebración do seu día.
Xa no verán, o 26 de xullo ten lugar o Día da Comprensión Lectora e o 22 de agosto conmemorarase o centenario do nacemento de Isaac Díaz Pardo. No mes de setembro celebrarase o 8 o Día da alfabetización, o 26 o Día Europeo das Linguas, o 28 o Día do dereito de acceso universal á información e o 30 o Día da Tradución.
O 15 de outubro será o Día das escritoras, o 24 o Día das Bibliotecas e o 30 conmemorarase o centenario da publicación da revista Nós. Chegamos a novembro coa celebración do Día da Filosofía e das Librarías o 17. Pecha este calendario o Día da Edición e o nacemento de Ánxel Casal o día 17 de decembro.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
