viernes, 4 de julio de 2025
O conselleiro de Economía, Emprego e Industria, Francisco Conde, anunciou hoxe que se vai realizar un investimento de 5 millóns de euros para dotar o Centro de Innovación Aerotransportada (CIAR) de Rozas dun simulador de xestión do tráfico aéreo. A nova iniciativa no Polo Aeroespacial de Galicia, que se desenvolverá a través da colaboración do Centro para o Desenvolvemento Tecnolóxico Industrial (CDTI), permitirá, tal e como sinalou o conselleiro, que as pemes galegas poidan desenvolver nova tecnoloxía e que Galicia siga á vangarda e siga sendo pioneira no desenvolvemento de tecnoloxías e infraestruturas vinculadas aos vehículos non tripulados.
Conde participou en Madrid na xornada de presentación da Consulta Preliminar do Mercado sobre o reto tecnolóxico Entorno de simulación U-Space de Rozas, para dar a coñecer ás empresas o procedemento polo que se licitará a nova infraestrutura, a través da compra pública precomercial.
Na súa intervención, o conselleiro de Economía, Emprego e Industria sinalou que o futuro simulador permitirá dar un paso máis pensando no futuro e en abrir novas oportunidades ás pemes e centros tecnolóxicos, para que poidan participar nun novo programa e nova licitación que desenvolverá en Rozas un simulador que vai permitir xestionar o tráfico aéreo tripulado e non tripulado.
A iniciativa enmárcase no Polo Aeroespacial de Galicia, que supón un investimento público-privado de 165 millóns de euros e que, tal e como lembrou Francisco Conde, xa é unha realidade, con 50 empresas desenvolvendo 35 proxectos de I+D+i, que suman 400 empregos.
O concepto U-Space deséñase para dar solución aos novos paradigmas de transporte que xurdirán nas cidades nos próximos anos. As tecnoloxías e os prototipos a desenvolver en torno ao novo simulador deberán contribuír a avanzar no desenvolvemento dun marco regulatorio europeo e global que facilite as operacións rutinarias de vehículos aéreos non tripulados a baixa altura.
O conxunto de infraestruturas de simulación que se realizan permitirán a Rozas operar como infraestrutura de soporte ao desenvolvemento en paralelo da tecnoloxía e a regulación, á fin de ampliar o mercado de usos civís dos UAVs e acelerar a xeración de actividade económica e industrial deste sector.
EuroPCom, a Conferencia Europea de Comunicación Pública, é a maior reunión anual de expertos en comunicación pública de Europa organizada polo Comité Europeo das Rexións en colaboración coa Comisión Europea, o Parlamento Europeo, o Consello, o Banco Europeo de Investimentos, o Comité Económico e Social Europeo e a Organización para a Cooperación e o Desenvolvemento Económicos. O evento ofrece unha plataforma para explorar as últimas tendencias, iniciativas e ideas no ámbito da comunicación pública. O director xeral de Relacións Exteriores e coa Unión Europea, Jesús Gamallo, participou nesta Conferencia organizada polo Comité Europeo das Rexións, e celebrada baixo o lema 'Máis alá das palabras. Unha historia de confianza'.
O Diario Oficial de Galicia publica hoxe a declaración de Ben de Interese Cultural da Rapa das Bestas de Sabucedo por considerar acreditado o seu valor sobranceiro como patrimonio inmaterial do pobo galego, ao tratarse dunha das festas máis antigas de Galicia que conta, como mínimo, con tres séculos de historia. Este recoñecemento supón a aplicación de inmediato do réxime de tutela da Lei de Patrimonio Cultural e, polo tanto, o maior nivel de protección. Esta distinción, que se suma á de Festa de Interese Turístico Internacional acadada en 2007, chega tras o visto e prace a este decreto por parte do Consello da Xunta este pasado luns, 30 de xullo, e logo de completarse o expediente administrativo, no que constan os dous informes preceptivos dos órganos consultivos favorables.
