sábado, 7 de noviembre de 2026
A organización do festival, que estivo dirixido por Laura Seoane, considera que a selección de películas gañadoras, das que tres de cinco está realizadas por directoras, vén a confirmar o plantexamento que tivo nesta edición o festival, no que o feminismo foi o eixo transversal, non só polo número de directoras que tiveron os seus filmes na sección competitiva de Cineuropa e que acadaron o 40% do total, senón tamén polos temas, visións e problemáticas que se abordan en moitos deles, dende un punto de vista feminino e feminista. Unha liña que se seguiu tamén na elección dos tres Premios Cineuropa deste ano, adicados ás actrices María Vázquez e Emma Suárez e á directora Rita Azevedo Gomes.
A dirección salienta tamén a boa acollida por parte do público dalgunhas novidades postas en marcha este ano como foron a selección de cinco películas gañadoras, unha por categoría, e a programación durante os dous últimos días de Cineuropa destes títulos. Así, deuse aos espectadores e espectadoras a posibilidade de volver a ver os filmes que máis gustaron ao público.
O festival despídese ata o vindeiro ano cun balance positivo que tamén axudaron a acadar as 30 presentacións realizadas en torno ao mundo do cinema das que 21 foron protagonizadas por directores e directoras e as proxeccións de 18 películas galegas, entre as que se contaron as estreas de películas como Arima (que participou na sección oficial europea), Longa Noite e Eroski Paraíso.
Cineuropa é un festival organizado polo Concello de Santiago, a través do Auditorio de Galicia, coa colaboración do Consorcio de Santiago e a Deputación da Coruña. Conta tamén co apoio da AGADIC da Xunta de Galicia, o Museo das Peregrinacións e de Santiago, o ICAA do Ministerio de Cultura e Deporte e os Multicines Compostela. Ademais, o festival é apoiado tamén polas seguintes institucións culturais e empresas da cidade: Grupo Nissan Caeiro Rey, Café Candelas, Acopros, Extramundi, O Raio Verde, La Flor, Hotel Costa Vella e Hoteles Avenida.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
