sábado, 7 de noviembre de 2026
Esta cita deu os seus primeiros pasos en xullo de 1998, coincidindo co centenario dunha das máis famosas xeracións de escritores da literatura española, coa reunión de 26 autores novos baixo o auspicio do propio Camilo José Cela, na que debatiron sobre as súas preocupacións e do seu futuro como escritores. Dez anos despois, en 2008, a Fundación reuniu aos mesmos autores para coñecer a súa evolución profesional e a do sector e este ano, por terceira vez, volven reunirse para facer un repaso das súas carreiras, as súas expectativas e as súas perspectivas ante un mercado editorial cada vez máis heteroxéneo e cambiante.
30 aniversario da concesión do Premio Nobel
A Xunta de Galicia conmemora ao longo deste último trimestre do ano o 30 aniversario da concesión do premio Nobel a Camilo José Cela cunha programación, a través da Fundación Pública que custodia o seu legado en Iria Flavia, centrada nos máis pequenos, na actividade literaria e na lembranza do que supuxo e aínda supón que un galego recibira tan magno galardón.
Neste sentido, de novembro a febreiro ten lugar un venres pola tarde de cada mes, e coa colaboración de Javier Pintor, as xornadas Tardes de Libros nos #30AnosNobelCela no que se presentarán no paraninfo do Museo catro novas editoriais en galego e en castelán coa participación de cada un dos seus autores.
O 10 de decembro, ademais do acto institucional en homenaxe ao escritor, terán lugar en Iria Flavia a presentación da nova páxina web da Fundación e o Acto homenaxe do pobo de Padrón en lembranza de como toda unha vila acompañou ao único Nobel galego e que pretende rememorar, dun xeito emotivo, a aqueles padroneses que acompañaron ao escritor a Estocolmo e a cantos viviron ese momento de gran alegría desde a propia vila de Padrón.
A mediados de decembro, finalmente, terá lugar unha xornada, en colaboración coa Universidade Camilo José Cela, de conmemoración dos 50 anos da publicación dunha das novelas que os expertos están a incluír entre as máis importantes do escritor, San Camilo 1936, e que contará coa presenza de, Adolfo Sotelo Vázquez, catedrático de Literatura Española da Universidade de Barcelona, e Dolores Troncoso Durán, Catedrática de Literatura Española da Universidade de Vigo.
Programa do III Encontro de Escritores de Iria Flavia
Martes 19 de novembro
10,30 h. Inauguración do encontro.
11,00 h. Mesa redonda moderada por Adolfo Sotelo: A novela flúe do fondo do pozo da traxedia. Con Lorenzo Silva, Óscar Esquivias, Care Santos.
12,45 h. Mesa redonda moderada por Ernesto Sánchez Pombo: Do monte Meda ao río do arzobispo. Con Manuel Loureiro, Ledicia Costas, Estíbaliz Espinosa, Xosé Carlos Caneiro e José Antonio Ponte Far.
17,00 h. Mesa redonda moderada por Laura Revuelta: A irmandade das artes. Palabras cruzadas. Con Gloria Méndez, Antonio Álamo, Josan Hatero.
Mércores 20 de novembro
10,30 h. Mesa redonda moderada por Sergio Vila-Sanjuan: Literatura e mercado editorial, como chegar aos lectores? Con Carlos Castán, Ángela Vallvey e Luis García Jambrina.
12,15 h. Mesa redonda moderada por Blanca Berasátegui: Os elixidos de Cela, 30 anos despois. Que escriben, que leen, que lamentan. Con Lucía Etxebarría, Blanca Riestra e Toni Montesinos.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
