viernes, 18 de septiembre de 2026
Deste xeito, buscan contribuír ao desenvolvemento e á competitividade das pemes do sector artesán, así como incentivar nelas a innovación, o deseño e a súa capacidade de adaptación ao mercado. A presenza galega entre os finalistas destes premios é habitual, e así, nas 12 edicións que se levan celebrado foron elixidas como finalistas 25 candidaturas galegas, das que 10 acadaron finalmente o premio e unha recibiu unha mención especial.
Na súa duodécima edición, os Premios Nacionais de Artesanía rexistraron 90 candidaturas procedentes de toda España. Delas, 16 finalistas (4 deles galegos) optan ás cinco categorías a concurso. Os gañadores daranse a coñecer nunha cerimonia prevista para o próximo 4 de decembro.
Candidaturas galegas
A Fundación Artesanía de Galicia ten en marcha desde 2013 o proxecto Artesanía no prato, que ten como finalidade xerar unha interrelación entre artesanía, deseño e gastronomía, dando a coñecer o potencial das pezas artesás como soporte das creacións culinarias. No marco desta iniciativa, achéngase os produtos dos obradoiros artesáns galegos aos campos da gastronomía, hostalería e restauración. Apóstase pola calidade, a innovación e a creatividade, fomentando experiencias con novos soportes e materiais. Froito deste proxecto, máis de 40 artesáns están a traballar con cociñeiros galegos e nacionais, así como con grandes empresas distribuidoras de enxoval para hostalería. Os vindeiros 27 e 28 de outubro celebraranse en Expocoruña as II Xornadas Profesionais Artesanía no Prato, unha das iniciativas incluídas neste proxecto.
Elena Ferro, do taller Eferro (Vila de Cruces, Pontevedra), opta como finalista a recibir o galardón na categoría de Premio Nacional de Artesanía. Elena Ferro xa fora finalista en 2011, na categoría Premio Produto. Destaca polo seu traballo cun produto característico da tradición rural: os zocos de madeira. Neste taller, en funcionamento desde 1915, veñen desenvolvendo o seu traballo artesán tres xeracións da familia Ferro. Co cambio no valor de uso do calzado de traballo, Elena Ferro outórgalle un novo significado a este produto sen arrebatarlle a súa esencia, reinventando o seu uso como complemento de moda con constantes innovacións en deseños, materiais e cores. A través do seu traballo, a artesá dotou a este produto tradicional dun grao de innovación para adaptarse ás necesidades do mercado, novos usos e públicos.
A ceramista e enxeñeira Paula Ojea, de Ojea Studio (Vigo), é finalista da categoría Premio Produto á que opta coa súa colección Cut&Fold. Esta serie caracterízase polas súas formas xeométricas imposibles, que segundo o punto de vista desde o que se observen inclínanse cara distintos lados, semellando inestables. Son pezas que exploran contrastes, entre a precisión do deseño e a irregularidade do proceso artesanal. Foron deseñadas con mentalidade e xeito de traballar propias da enxeñería e realizadas de forma artesanal. A serie, que evoca o papel cortado e dobrado, permite incorporar deseños máis utilitarios (xerras, xarróns, cuncas, e pratos) que usan chefs de alta cociña para servir as súas creacións. Os seus singulares deseños son realizados a man, de xeito que nunca dúas pezas son idénticas. Desde a modelaxe ou colaxe da arxila ata o esmaltado, todo se fai de maneira individual. En 2017 este obradoiro resultara gañador da Bolsa Eloy Gesto que concede a Fundación Artesanía de Galicia para formación especializada nun centro de prestixio.
Na categoría Premio ao Emprendemento resultou finalista Anaquiños de Papel (A Coruña). Este obradoiro, dirixido polas irmás Cristina e Beatriz Velasco desde 2014, foi gañador da Bolsa Eloy Gesto o ano pasado. A materia prima deste estudio de deseño e creatividade é o papel, co que elaboran obxectos de decoración como lámpadas, flores, animais ou tocados usando con técnicas de origami e paperart. Este proxecto innova no sector artesán do papel, aínda non moi coñecido en España, o que lles deu a posibilidade de crecer e posicionarse chegando a ser un referente no sector. Nun breve espazo de tempo xa teñen colaborado con Loewe, Cartier, Inditex, Cruz Vermella ou Ecoembes. A súa filosofía é o deseño responsable e sostible.
Tivo lugar o acto de entrega dos Premios de Responsabilidade Social Empresarial de Galicia 2026, que puxeron en valor a importancia de promover unha cultura empresarial que integre a responsabilidade social no seu modelo de xestión e sitúe as persoas no centro da actividade. As entidades premiadas foron Galaica Consultaría Integral e Nasas Social Media, na categoría de pequena empresa; Torres y Sáez, na de mediana empresa; Citanias Obras y Servicios, na de grande empresa; e Altia, coa Mención á Conciliación.
A conselleira do Mar, Marta Villaverde, defenderá ante o Goberno central a posición de Galicia sobre o futuro da Política Pesqueira Común, baseada na necesidade de garantir financiamento suficiente para o sector, facilitar a renovación e modernización da frota e avanzar cara a un modelo de xestión que teña en conta tanto a conservación dos recursos como a viabilidade económica e social da actividade. Villaverde trasladará que Galicia afronta este debate desde unha posición singular pola dimensión e diversidade do seu complexo mar-industria, cunha extensa frota de baixura e pequena escala, unha importante presenza da altura e gran altura, unha industria transformadora e conserveira de referencia e unha acuicultura cun destacado peso na produción comunitaria.
